NYT: АҚШ Куба президентининг истеъфосини талаб қилмоқда

Доналд Трамп маъмурияти Куба президенти Мигел Диас-Канел ҳокимиятдан четлатилишига эришмоқчи, деб хабар берди The New York Times тўртта манбага асосланиб. 

Музокаралар чоғида Америка томони Кубага мамлакат президенти кетиши кераклигини маълум қилган, шу билан бирга, кейинги қадамлар кубаликларнинг ихтиёрига қолдирилган. Трамп маъмурияти расмийларига кўра, Диас-Канелнинг ҳокимиятдан четлатилиши Кубада таркибий иқтисодий ислоҳотларни амалга ошириш имконини беради, Вашингтоннинг фикрича, мамлакатнинг амалдаги президенти уларни қўллаб-қувватлаши даргумон.

NYT суҳбатдошларидан бирига кўра, Вашингтон Куба ҳамон Фидел Кастро ғояларига содиқ қолаётган айрим кекса сиёсатчилар ҳам ҳокимиятдан четлатилишини хоҳлайди. Шу билан бирга, АҚШ ҳозирча мамлакатда жуда нуфузли шахслар бўлиб қолаётган Кастро оиласи аъзоларига қарши ҳеч қандай чора кўришни талаб қилмаяпти.

Газета манбасининг сўзларига кўра, Куба президентининг ҳокимиятдан четлатилиши Доналд Трамп учун Венесуэлада бўлгани каби «узоқ вақтдан бери АҚШга қарши бўлган сўл ҳукумат раҳбарини ағдарганини эълон қилиш имконини берувчи рамзий ғалаба бўларди». «АҚШ расмийлари нуқтайи назарига кўра, музокаралар Куба ўз иқтисодиётини Америка ишбилармонлари ва компаниялари учун босқичма-босқич очиб беришига, қарам давлат яратилишига замин яратишга, шунингдек, Трамп эълон қилиши мумкин бўлган бир нечта рамзий сиёсий ғалабаларга эришишга қаратилган», – дейилади материалда.

65 ёшли Мигел Диас-Канел 2018 йилдан буён Куба президенти ҳисобланади. The New York Times уни давлатнинг номинал раҳбари деб атаган. Куба собиқ президенти, ҳозирда 94 ёшда бўлган ва ҳамон мамлакатда катта таъсирга эга Раул Кастро Диас-Канелни ўз вориси этиб танлаганди. 

Доналд Трамп аввалроқ АҚШ Кубани «дўстона қўшиб олиши» мумкинлигини айтганди. Унинг фикрича, Куба ҳукумати «тез орада қулайди». The Wall Street Journal хабарига кўра, Трамп маъмурияти 2026 йил охиригача мамлакатда ҳокимиятни алмаштириш учун Куба ҳукумати ичидан агентлар излаган.

Мигел Диас-Канел 13 март куни Куба вакиллари АҚШ ҳукумати билан музокаралар бошлаганини айтди. Унинг сўзларига кўра, Куба расмийлари мулоқот орқали «мамлакатлар ўртасида мавжуд бўлган икки томонлама келишмовчиликлар учун ечим топиш»ни истайди.

16 март куни Кубада блэкаут юз берди. Диас-Канел уч ойдан ортиқ вақтдан буён мамлакатга нефт кирмаётгани ва қуёш энергияси, табиий газ ва иссиқлик электр станциялари ҳисобига ишлаётганини айтган. Куба олдин нефтни Венесуэладан оларди, бироқ АҚШ Венесуэла раҳбари Николас Мадурони ағдаргач, етказиб бериш тўхтатилди.