АҚШ Конгрессига оралиқ сайловда республикачиларнинг мағлубиятга учраши Оқ уйдаги кайфиятни тушириб юборди. Доналд Трамп қаттиқ ғазабланди ва атрофидагилар билан деярли гаплашмаяпти, деб хабар берди The Daily Mail.
«Қароргоҳда жуда тушкун муҳит ҳукм сурмоқда. Вазият оғир», — деди нашрга юқори мартабали амалдорлардан бири.
Оралиқ сайловнинг дастлабки натижаларига кўра, Демократик партия АҚШ Конгрессининг иккала палатасида ҳам кўпчилик ўринни қўлга киритди. Демократлар Вакиллар палатасида 241 та, Сенатда эса 54 та ўринни нақд қилди. Қуйи палатада кўпчилик бўлиш учун 218 та, юқори палатада эса 51 та мандат зарур.
Доналд Трамп сўнгги 20 йил ичида партияси оралиқ сайлов натижасида Конгресснинг бирданига иккала палатасини ҳам бой берган биринчи президентга айланди (охирги марта бундай ҳолат 2006 йилда кичик Жорж Буш билан содир бўлган эди).
Республикачилар мағлубиятининг кўлами аён бўлгач, Трамп ғазабини яширмади ва атрофдагилар билан деярли гаплашмади, деб ёзди нашр.
«У Fox News’ни деярли лом-мим демай томоша қиляпти ва гўё сукутдан қотиб қолгандек», — деб сўзлаб берди президентга яқин манба The Daily Mail нашрига.
Республикачилар мағлубиятининг кўлами ойдинлашгани сайин, Трамп тарафдорлари Оқ уйнинг Шарқий залида овозларни санаш жараёнини кузатиш учун уюштирилган кечани тарк эта бошлади. Аввал маъмуриятнинг юқори мартабали ходимлари, сўнгра Вазирлар Маҳкамасининг айрим аъзолари кетди. Кеча аввалида иштирок этган давлат котиби Марко Рубио кейинроқ кўздан ғойиб бўлди.
Кечга яқин, Вакиллар палатасида демократлар ғалаба қозонгани маълум бўлган вақтга келиб, зал деярли бўшаб қолган эди. Баъзи ходимлар нафақат зиёфатни, балки Оқ уйни ҳам тарк этиб, Вашингтондаги яқин атрофдаги барларга йўл олди.
Шу билан бирга, Оқ уйнинг юқори мартабали амалдорлари сайловдаги мағлубият учун айбдор деб ҳисоблаётган шахслар — давлат котиби Марко Рубио ва мудофаа вазири Пит Ҳегсетнинг номини айтишга ҳам улгуришди.
«Агар Эрон билан уруш бўлмаганида, бугунги оқшом бутунлай бошқача кечган бўларди. Ишонаманки, охир-оқибат АҚШ президенти Ҳегсетни жавобгарликка тортади», — деди нашрга амалдорлардан бири. Газетанинг бошқа бир манбаси эса Рубионинг сиёсий фаолияти, катта эҳтимол билан, якунига етганини билдирди. Унинг фикрича, бу Трампнинг ташқи сиёсатига таъсир кўрсатган бошқа республикачиларга ҳам тааллуқли бўлиши мумкин.
