«Реал» «Бавария»га қарши, «Барса» яна «Атлетико» билан ўйнайди. ЕЧЛда чоракфинал жуфтликлари

Чоршанба оқшомида Чемпионлар лигаси 2025/26 йиллар мавсуми 1/8 финали доирасида яна тўрт учрашув ўтказилди: «Арсенал», «Реал», «ПСЖ» ва «Спортинг» ортидан «Барселона», «Атлетико», «Бавария» ва «Ливерпул» жамоалари ҳам кейинги босқичга йўлланма олишди.

Чемпионлар лигаси 1/8 финал натижалари

«Реал» – «Манчестер Сити» – 5:1 (биринчи ўйин – 3:0, жавоб ўйини – 2:1).
«ПСЖ» – «Челси» – 8:2 (5:2, 3:0).
«Спортинг» – «Будё-Глимт» – 5:3 (0:3, 5:0).
«Арсенал» – «Байер» – 3:1 (1:1, 2:0).
«Атлетико» – «Тоттенҳэм» – 7:5 (5:2, 2:3).
«Барселона» – «Нюкасл» – 8:3 (1:1, 7:2).
«Ливерпул» – «Галатасарой» – 4:1 (0:1, 4:0).
«Бавария» – «Аталанта» – 10:2 (6:1, 4:1).

Плей-оффнинг тўлиқ сеткаси олдиндан маълум эди, бундан кейин бошқа қуръа ташланмайди. Чоракфиналга чиққан жамоалар ўзларининг навбатдаги рақибларини аллақачон билишади.

1/4 финал жуфтликлари

«Реал» – «Бавария»
«ПСЖ» – «Ливерпул»
«Спортинг» – «Арсенал»
«Барселона» – «Атлетико»

Биринчи бўлиб кўрсатилган жамоалар биринчи ўйинни ўз уйида ўтказади.

1/4 финал ўйинлари тақвими

Кейинги босқич деярли уч ҳафтадан кейин, март ойидаги ФИФА кунлари ортидан бошланади. Чоракфиналдаги уй ва сафар учрашувлари ораси бир ҳафтани ташкил этади.

Март ойи охирида Европа ёзги вақтга ўтади, шунинг учун Чемпионлар лигаси яна Тошкент вақти билан соат 23:59 дан бошланади.

7–8 апрел. Биринчи ўйинлар

«Реал» – «Бавария»

«ПСЖ» – «Ливерпул»

«Спортинг» – «Арсенал»

«Барселона» – «Атлетико»

14–15 апрел. Жавоб ўйинлари

«Бавария» – «Реал»

«Ливерпул» – «ПСЖ»

«Арсенал» – «Спортинг»

«Атлетико» – «Барселона»

Биринчи ва иккинчи жуфтликлар ғолиблари ҳамда учинчи ва тўртинчи жуфтликлар ғолиблари яримфиналда ўзаро тўқнашади. 

Яримфинал баҳслари 28-29 апрел ва 5-6 май кунларига белгиланган.

Финал 30 май куни Будапештда бўлиб ўтади.

«Арсенал» ва «Бавария» – асосий фаворитлар

Ҳар бир босқичдан кейин Opta суперкомпютери Чемпионлар лигасида ким ғолиб бўлиши бўйича прогнозларини янгилаб бормоқда. Турнир стартидан олдин «Ливерпул»нинг имкониятлари энг юқори баҳоланганди, ўтган мавсум Англия чемпиони бўлган ва ёзги трансферларда энг фаол бўлган жамоага 20,6 фоиз берилганди, аммо вақт ўтиб бу жамоанинг имкониятлари уч баравар пасайтирилди – 7 фоизгача.

Турнир аввалида иккинчи асосий даъвогар «Арсенал» бўлиб турганди (15,3 фоиз), аммо лондонликларнинг имкониятлари вақт сайин ўсиб борди ва энди икки баравар юқори баҳоланмоқда.

Сетканинг иккинчи томонидаги асосий фаворит – «Бавария». Opta Англия ва Германия грандлари Будапештдаги финалга етиб келишини башорат қилмоқда. «Барселона» ва «ПСЖ»да ҳам яримфиналга чиқиш имконияти юқори баҳоланган.

Opta версиясига кўра, жамоаларнинг Чемпионлар лигаси ғолиблиги учун имкониятлари:

• «Арсенал»да стартдан олдин 15,3 фоиз, чоракфинал арафасида 30 фоиз;
• «Бавария»да стартдан олдин 4,5 фоиз, чоракфинал арафасида 18 фоиз;
• «Барселона»да стартдан олдин 8,8 фоиз, чоракфинал арафасида 14,7 фоиз;
• «ПСЖ»да стартдан олдин 12 фоиз, чоракфинал арафасида 12,1 фоиз;
• «Реал»да стартдан олдин 5,8 фоиз, чоракфинал арафасида 7 фоиз;
• «Ливерпул»да стартдан олдин 20,6 фоиз, чоракфинал арафасида 30 фоиз;
• «Атлетико»да стартдан олдин 0,8 фоиз, чоракфинал арафасида 4,7 фоиз;
• «Спортинг»да стартдан олдин 0,8 фоиз, чоракфинал арафасида 3,3 фоиз.