Олмалиқдаги 3-мис бойитиш фабрикаси дунёдаги йирик корхоналар қаторидан жой олди

“Дунё” АА хабар беришича, мақолада президент Шавкат Мирзиёев томонидан рамзий тугмани босиш орқали ишга туширилган мазкур лойиҳа мамлакат иқтисодиёти учун стратегик аҳамиятга эга экани таъкидланган.

Қиймати 2,7 миллиард доллар бўлган, 196 гектар майдонда барпо этилган завод йилига 60 миллион тонна рудани қайта ишлаш қувватига эга. Бу кўрсаткич билан у нафақат Марказий Осиёда, балки дунёдаги энг йирик корхоналар қаторидан жой олгани қайд этилган.

Нашрда миснинг энергетика, электротехника, рақамлаштириш, сунъий интеллект ва “яшил” иқтисодиётдаги аҳамияти алоҳида урғу билан ёритилган. Шунингдек, Ўзбекистонда хомашёни экспорт қилишдан кўра, уни чуқур қайта ишлашга ўтиш мақсад қилингани таъкидланган.

Маълум қилинишича, жорий йилда мисни қайта ишлаш қувватини 240 минг тоннага етказиш режалаштирилган.

Лойиҳанинг технологик устунлиги сифатида ишлаб чиқариш жараёнларининг рақамли назорат остида экани ва сунъий интеллект ёрдамида бошқарилиши қайд этилган. Бу эса энергия сарфини 10 фоизга, ишлаб чиқариш харажатларини эса 15 фоизга камайтириш имконини беради.

Шунингдек, “Ёшлик-1” ва “Қалмоқир” конларида қарийб 45 миллион тонна мис ва 5000 тоннадан ортиқ олтин захиралари мавжуд экани, бу ресурслар камида 100 йилга етиши таъкидланган. Молибден, селен, теллур ва рений каби нодир металлар эса келгусидаги инновацион лойиҳалар учун муҳим асос бўлиб хизмат қилади.

Deutsche Allgemeine Zeitung таъкидлашича, мазкур лойиҳа Ўзбекистон учун нафақат саноат ютуғи, балки технологик модернизация ва барқарор иқтисодий ўсиш сари йўналтирилган муҳим қадам ҳисобланади.