Маданий мерос агентлигида янги тайинлов амалга оширилди

Ҳукумат қарорига мувофиқ, Нажимов Элмурод Иқболжон ўғли эндиликда Ўзбекистон Маданий мерос агентлиги директорининг биринчи ўринбосари сифатида фаолият олиб боради. Унинг мазкур лавозимга тайинланиши агентлик фаолиятини янада самарали ташкил этиш, маданий мерос объектларини муҳофаза қилиш, асраб-авайлаш ва келажак авлодга етказиш борасидаги ишлар изчил давом эттирилишини таъминлашга қаратилгани билан аҳамиятлидир.

Мазкур тайинлов муносабати билан ушбу лавозимда фаолият юритиб келган Қўзиев Турсунали Каримжонович бошқа ишга ўтиши сабабли эгаллаб турган вазифасидан озод этилди. Унинг агентлик тизимидаги фаолияти давомида соҳани ривожлантириш, маданий мерос объектларини сақлаш ва тарғиб қилиш йўлида муайян ишлар амалга оширилгани таъкидланмоқда.

Маданий мерос агентлиги мамлакат ҳудудида жойлашган тарихий обидалар, археологик ёдгорликлар, зиёратгоҳлар, музейлар ва бошқа маданий бойликларни муҳофаза қилиш, улардан оқилона фойдаланиш ва халқаро миқёсда тарғиб этиш каби муҳим вазифаларни амалга оширади. 

Шу маънода, агентлик раҳбариятидаги бу каби тайинловлар соҳадаги ислоҳотларни янада жадаллаштириш, бошқарув самарадорлигини ошириш ҳамда миллий маданий меросни асраш борасидаги устувор йўналишларни изчил давом эттиришда муҳим аҳамият касб этади.