Зеленский Украинанинг ядро қуролидан воз кечишини «катта хато» деб атади

Украина президенти сўзларига кўра, Украинадан бу масалада ён беришни сўраган давлатлар унга «хавфсизлик соябонини», эҳтимол ядровий соябонни бериши керак эди.

Фото: president.gov.ua

Украина 1994 йилда хавфсизлик ваъдалари эвазига ядровий қуролдан воз кечиш бўйича Будапешт меморандумини имзолаб, нотўғри қарор қабул қилди. Бу ҳақда мамлакат президенти Володимир Зеленский The Rest Is Politics нашрига берган интервьюсида маълум қилди.

«НАТО аъзоси бўлиш - бу Украина ядро арсенали эвазига олиши керак бўлган энг кам нарса. Биз нимага эришдик? Ҳеч нарса. Бу адолатсиз ўйин ва катта хато эди», деди Украина раҳбари.

Унинг сўзларига кўра, Украинадан бу масалада ён беришни сўраган давлатлар унга «хавфсизлик соябонини», эҳтимол ядровий соябонни бериши керак эди.

«Охир-оқибат, буларнинг барчаси ёлғон бўлди. Ядровий қуролларимизнинг катта қисми Россияга топширилди. Масалан, Россия ҳозир бу урушда бизга қарши фойдаланаётган стратегик самолётлар ҳам», деди Украина президенти.

Украинанинг Ядро қуролини тарқатмаслик тўғрисидаги шартномага қўшилиши муносабати билан хавфсизлик кафолатлари тўғрисидаги меморандум (Будапешт меморандуми) 1994 йил 5 декабрда Украина, Россия, Буюк Британия ва АҚШ раҳбарлари томонидан имзоланган.

1991—1994 йилларда Украина кетма-кет Олмаота декларацияси, Лиссабон протоколи ва Ядро қуролини тарқатмаслик тўғрисидаги шартномага ядросиз давлат мақомида қўшилди. Украина ҳудудидаги барча ядро қуроллари Россияга топширилди ёки йўқ қилинди. Будапешт меморандуми Россия, Буюк Британия ва АҚШ Украинага ядровий қурол бериш эвазига берган хавфсизлик кафолатларини назарда тутган.