Украина ва Америкадаги мулозимлар урушни тўхтатиш бўйича тинчлик ташаббусларининг янги босқичи доирасида Россияга тақдим этилиши режалаштирилаётган ҳаводаги сулҳ таклифини муҳокама қилди, деб ёзади Reuters манбаларга таяниб.
Агентлик суҳбатдоши Украина аввал ҳам Владимир Путинга ўт очишни тўхтатиш бўйича таклифлар билан мурожаат қилгани, бироқ таклифлар рад этилганини таъкидлаган. Бироқ, баъзи расмийлар Украинанинг сўнгги ойлардаги ҳужумлари туфайли Россия иқтисодиётига тушаётган босим Путиннинг позициясини юмшатиши мумкин, деб ҳисобламоқда.
Бу хабар Володимир Зеленскийнинг Вашингтонга 28 июлга белгиланган ташрифи арафасида чиқмоқда. Ушбу ташриф давомида Украина президенти 11 июл куни вафот этган америкалик сенатор Линдси Грэм хотирасига бағишланган маросимда иштирок этиши ва Доналд Трамп билан учрашиши режалаштирилган.
Бундан бир неча кун олдин Киевга америкалик журналист, ўта ўнг фаол ва MAGA (Make America Great Again) ҳаракати тарафдори Лаура Лумер келган эди, у аввал АҚШ расмийларидан Украинани қўллаб-қувватлашни тўхтатишни талаб қилганди, кейин эса фикрини ўзгартирди. Унга берган интервюсида Зеленский Россия билан тинчлик битимини имзолаш учун Оқ уйдаги Овал кабинетга ёки Мар-а-Лагога (Трампнинг Флоридадаги қароргоҳи) боришга тайёрлигини айтди.
Россия ва Украина ўртасидаги музокараларнинг сўнгги босқичи 2026 йил феврал ойида – Яқин Шарқда янги уруш бошланишидан бироз олдин бўлиб ўтганди. Шундан сўнг Россия бир неча бор АҚШ музокараларда воситачиликка қайтишига умид билдирди. Шу билан бирга, Россия Киев ва Украинанинг бошқа шаҳарларига ракеталар ва дронлар билан зарба беришда давом этмоқда. Украина эса нефтни қайта ишлаш заводларини ўққа тутиб, мамлакатда ёқилғи инқирозини келтириб чиқарди, сўнгги бир ҳафтадан ортиқ вақт мобайнида эса Россия ҳудудларидаги Wildberries омборлари украин дронлари нишонига айланди.
Ҳаводаги сулҳ масаласи тахминан бир йил олдин – Трамп ва Путиннинг Аляскадаги учрашуви олдидан ҳам кўтарилган эди. Ўша учрашувдан бир неча кун олдин Bloomberg ўз манбаларига таяниб, Кремл АҚШ президентига ён бериш вариантларини, жумладан, ҳаводаги сулҳни кўриб чиқаётгани ҳақида ёзганди – ўшанда Трамп Путин билан мулоқотдан сўнг Украина шаҳарлари бомбардимон қилиниши давом этаётганидан норозилигини билдирганди. Бироқ якунда бундай сулҳ амалга ошмади.
25 июл куни Қозоғистон президенти Қосим-Жўмарт Тўқаев Омскда Владимир Путин билан учрашув чоғида Россия-Украина можаросини «музлатиш» таклифини билдирди. Кремл матбуот котиби Дмитрий Песков бу ғояга изоҳ бераркан, Киевнинг позициясини ҳисобга олган ҳолда «бундай музлатишнинг имкони йўқлиги»ни айтди. «Биз учун асосий шарт бор – биз ўз мақсадларимизга эришишимиз керак», – деди Песков. У ҳарбий ҳаракатларни тўхтатиш шартлари икки йил олдин Путин томонидан баён этилгани ва «агар Киев режими тегишли қарорларни қабул қилса, уруш шу куннинг ўзида тўхташи мумкин»лигини қўшимча қилди.
