Хитойнинг Maike Metals International савдо уйи асосчиси Хэ Цзинби фирибгарлик ва бошқа жиноятларга оид иш бўйича умрбод қамоқ жазосига ҳукм қилинди. Бу ҳақда Bloomberg хабар берди.
Агентлик суҳбатдошларининг сўзларига кўра, Сиан шаҳри суди сентябрь ойида Maike компанияси раҳбарини шартномавий фирибгарлик, порахўрлик ва бошқа жиноятларда айбдор деб топиб, ҳукм чиқарган. Bloomberg манбаларининг таъкидлашича, суд компаниянинг хатти-ҳаракатлари Хитойнинг бир нечта банкига 1 миллиард доллардан ортиқ зарар кўриш хавфини туғдирганини аниқлаган.
61 ёшли тадбиркор ҳукм устидан шикоят киритган. Суд қарорининг ўзи эълон қилинмаган.
Суд жараёнида ҳимоя томони тадбиркор ҳам, унинг компанияси ҳам фирибгарлик қилиш ниятида бўлмаганини қатъий таъкидлаган. Bloomberg хабарига кўра, адвокатлар Maike ўн йилдан ортиқ вақт мобайнида банклар билан ҳамкорлик қилиб келганини ҳамда пандемия чекловлари туфайли пул оқимлари ёмонлашгандан кейин ҳам мажбуриятларини бажаришга интилиб, кредитларни мунтазам равишда сўндириб борганини кўрсатиб ўтишган. Ҳимоя томонининг талқинига кўра, банк йўқотишларининг ҳеч бўлмаганда бир қисми кредиторларнинг ўзидаги хавф-хатарларни бошқариш ички тизимларининг камчиликлари билан боғлиқ бўлган.
Хэ Цзинби 1993 йилда Сиан шаҳрида дўстлари билан бирга 50 минг юан — ўша пайтдаги курс бўйича тахминан 8,7 минг доллар миқдорида кредит олиб, Maike компаниясига асос солган. Компания ишни механик ва электротехника маҳсулотлари савдосидан бошлаб, кейинчалик металлолом, мис симлар ва тозаланган мис савдосига ўтган. Bloomberg нашрининг таъкидлашича, компания ўз ривожланишининг энг юқори чўққисида Хитой мис импортининг тўртдан бир қисмини таъминлаган.
Maike ўзи ташиган ва омборларда сақлаган металлни гаровга қўйиб кредитлар жалб қилган, шунингдек, меҳмонхоналар ва бизнес марказларига сармоя киритган. 2022 йилда пандемия чекловлари компания фаолиятини издан чиқарди, Хитой кўчмас мулк бозоридаги инқироз эса унинг инвестицияларига зарба берди. Бундан ташқари, мис нархининг тушиб кетиши молиявий қийинчиликларни янада кучайтирди.
2023 йил октябрь ойида Maike раҳбарлари асосчи билан алоқани йўқотиб, уни полиция ҳибсга олган деган тахминга боришди. Кейинги ойда компания банкротлик тўғрисида ариза берди.
