Балконда кир ёйишга тақиқ, БСКга эса аниқ мажбуриятлар. Кўп квартирали уйлар учун янги қоидалар тасдиқланди

Адлия вазирлиги «Кўп квартирали уйларни сақлаш ва улардан фойдаланиш қоидалари»ни давлат рўйхатидан ўтказди.

Янги қоидаларга кўра, кўп квартирали уйлар учун бошқариш органлари томонидан умумий техник паспорт юритилади.

Бошқариш органлари юк кўтарувчи конструкциялар, кузатув камералари ва домофонлар соз ҳолатда сақланиши, хомашё, материаллар, ёқилғи, инвентар ва хўжалик анжомларини сотиб олиш ишларини амалга оширади.

Кўп квартирали уйнинг фасад қисмларида ва умумий фойдаланиш ҳудудларида мулкдорлар умумий йиғилишининг қарори билан меъморчилик деталлари, рекламалар, афишалар, ва эълонларни ўрнатиш мумкин бўлади.Уйларда шовқин даражаси белгиланган санитария меъёрларидан ошмаслиги шарт.

Уйлар (зинапоялар, лифтлар, чиқинди камераси, чиқиндиларни тўплаш мосламалари ертўлалари ва бошқалар), туташ ҳудудлар заруратга кўра, бошқариш органи томонидан дератизацияланади, дезинсекция ва дезинфекцияланади.

Уйларнинг ертўла қисмидаги қувурларда авария ҳолати юзага келиши оқибатида сув ёки оқова сув тўпланиб қолса бошқариш органи 24 соат мобайнида ертўладаги сув ва оқова массаларини чиқариб юбориши лозим.

Бошқариш органи томонидан ҳафтада бир марта кўп квартирали уйларнинг кириш йўлаклари ва лифт хоналарини тозалаш ҳамда доимий равишда лифт ускуналарини техник мониторинг қилиш амалга оширилади. Шунингдек, БСК томонидан кириш йўлаклари ва зинапоялар ёритиш чироқлари билан таъминланиши, ҳафтада бир маротаба тозаланиши, бир ойда камида бир маротаба деворлари билан қўшиб ювилиши керак. Энергия истеъмолини камайтириш мақсадида кириш йўлаклари ва зинапояларга энергия тежамкор сенсор лампалар ўрнатилиши мақсадга мувофиқ.

Нималар тақиқланяпти?

Янги ҳужжатга кўра, кўп квартирали уйларда қуйидагилар тақиқланди:

• ёнғин хавфини келтириб чиқарувчи ускуналарни балкон ва лоджияга ўрнатиш;
• балконда оғир буюмларни сақлаш;
• балкон ва лоджиянинг фасад (ташқи) қисмида кир, кийим-кечак, гилам ва бошқаларни осиб қўйиш (ички қисми бундан мустасно);
• уй ҳайвонларини умумий фойдаланишдаги жойларда, зинапояда, чердакда, ертўлада, шунингдек умумий фойдаланишдаги ошхонада, балконда ва лоджияда сақлаш;
• кириш йўлакларининг зинапоя майдонида ва зинапоянинг остида ёнувчи материалларни сақлаш;
• умумий иссиқлик параметрларига таъсир кўрсатувчи қайта режалаштириш (реконструкция) ишларини амалга ошириш, қўшимча иситиш юзаларига (иситилмайдиган юзалар) иссиқлик ускуналарини ўрнатиш, шунингдек, умумий мулк таркибига кирувчи иссиқлик тизимларига ўзгартириш киритиш.

Шунингдек, автотранспорт воситаларини кўп квартирали уйлар ва унга туташ ер участкаларидаги газонлар усти, хиёбон, болалар майдончалари, тротуарга, кириш йўлаклари қаршисига қўйиш тақиқланади.

Кўп квартирали уйларни бошқариш органи аҳолига қулайлик яратиш мақсадида қуйидагиларни амалга ошириши лозим:

• кўп квартирали уйга туташ ер участкасида ўриндиқлар ўрнатиши;
• тегишли масофада чиқиндиларни ташлаш учун чиқиндиларни ажратувчи урна жойлаштириш.

Уйларга туташ ер участкаларида қуйидаги умумий фойдаланиш майдончалари бўлиши керак:

• мактабгача ва мактаб ёшидаги болалар ўйнаши учун;
• катта ёшдаги аҳолининг дам олиши учун;
• жисмоний тарбия машғулотлари билан шуғулланиш учун;
• маиший чиқиндиларни йиғиш учун;
• ит ва бошқа уй ҳайвонларини сайр қилдириш учун;
• велосипед ва бошқа мобил воситаларни (самокат, ногиронлиги бўлган шахслар ва болаларнинг аравачалари) сақлаш учун.

Уйларга туташ ер участкаси ҳамда инфратузилма объектлари ободонлаштирилиши, дарахтлар ва ўсимликларга, ўтиш йўлкалари ва тротуарларга сув сепиш учун муҳандислик-техник қурилмалар билан жиҳозланиши, электр ёритиш тизимига эга бўлиши керак.

Кўп квартирали уйларда бошқариш органи иссиқлик тизимларининг ишлашини назорат қилиши, яхши исимаслик ёки иссиқлик энергиясининг ҳаддан ташқари кўп сарфини келтириб чиқарадиган носозликлар ва унинг оқибатларини дарҳол бартараф этиши шарт.

Кўп квартирали уйларга ўрнатилган ёнғин автоматикаси тизимларини (автоматик ёнғин сигнализацияси, ёнғиндан хабардор ва эвакуация қилиш, тутунга қарши шамоллатиш тизимлари ҳамда автоматик ёнғин ўчириш қурилмалари ва бошқа автоматик ёнғинга қарши ҳимоя техник ускуналарини) ишчи ҳолатда сақлаб туриш учун бошқариш органлари штатида ёнғин хавфсизлиги бўйича камида бир нафар мутахассис бўлиши лозим.