Шавкат Мирзиёев Хитой заводидаги фожиа муносабати билан Си Жинпингга ҳамдардлик билдирди

Президент Шавкат Мирзиёев Хитойнинг Хунан провинциясидаги саноат корхонасида юз берган фожиа оқибатида кўплаб инсонлар қурбон бўлгани ва жиддий жароҳат олгани муносабати билан Хитой раиси Си Жинпингга ҳамдардлик билдирди.

Давлат раҳбари вафот этганларнинг оила аъзолари ва яқинларига сабр-тоқат ва бардамлик сўзларини йўллаб, жароҳатланганлар тез фурсатда шифо топишини тилади.

Хитойнинг Хунан провинциясида мушаклар ишлаб чиқарувчи заводда рўй берган кучли портлаш оқибатида 30 га яқин одам ҳалок бўлди ва 60 дан ортиғи жароҳатланган эди.

Хитой раиси Си Жинпинг фожиадан сўнг расмийларга асосий тармоқларда хавф-хатарларни текшириш ва хавфни назорат қилишни кучайтириш, жамоат хавфсизлигини бошқаришни яхшилаш, одамлар ҳаёти ва мол-мулки хавфсизлигини таъминлаш бўйича топшириқ берди. У шунингдек айбдорларни жавобгарликка тортишга чақирди.