26 июл, якшанба куни кечқурун Киев марказидаги Иван Франко майдонида навбатдаги намойиш бўлиб ўтди. DW мухбири маълумотига кўра, бу гал майдоннинг қарийб ярмигина намойишчилар билан тўлган.
Акция иштирокчилари Михаил Федоровни мудофаа вазири лавозимига қайтариш билан бирга, Украина ветеранлар ишлари бўйича янги вазир Виталий Кимни алмаштириш ва парламент ишини қайта тиклашни талаб қилган.
Украина парламентининг ялпи мажлислари ёзги танаффус муносабати билан 18 августга қадар қолдирилган. Намойишчилар эса мамлакатда уруш давом этаётган бир пайтда депутатлар узоқ танаффусга чиқмаслиги кераклигини билдирмоқда.
Акцияда бир гуруҳ иштирокчилар мегафон орқали шиорлар айтган, қолган намойишчилар уларни такрорлаган. Хусусан, «Урушда таътил бўлмайди», «Федоров — Драпатий, бизни енгиб бўлмайди», «Ветеранлар вазирлигига ветеран керак» ва «Депутатлар ишга қайтсин» каби чақириқлар янграган.
Айрим иштирокчилар «Азов» ёзуви туширилган плакатларни ҳам кўтариб чиққан. Бу Еленовкадаги ахлоқ тузатиш колониясида украиналик ҳарбий асирлар ҳалок бўлганининг тўрт йиллиги муносабати билан амалга оширилган.
Зеленскийга Федоровни лавозимига қайтариш талаби
Намойиш иштирокчилари ўз талабларини нафақат плакатларга, балки асфалтга ҳам ёзган. Митинг ўтказилаётган ҳудудга кириш жойларида картон варақлар қўйилиб, истаган киши уларга ўз шиори ёки талабини ёзиши мумкин бўлган.
Айрим плакатларда Украина президенти Володимир Зеленскийга тўғридан тўғри мурожаатлар акс этган.
Шундай плакатлардан бирида «Қароқчи бўлма, Федоровни қайтар» деган ёзув бўлган. Уни ёзган йигит DWʼга бу ибора Зеленскийнинг 2019 йилдаги баёнотига ишора эканини айтган.
Ўшанда Зеленский йиғилишлардан бирида Бориспол шаҳар кенгаши котиби Ярослав Годунокни залдан чиқариб юборган ва уни «қароқчи» деб атаган эди. «Украинская правда» маълумотига кўра, Киевнинг Святошин туман суди 2002 йилда ўша пайтда «Беркут» махсус бўлинмаси ходими бўлган Годунокни талончилик билан боғлиқ хонадон ўғирликларида иштирок этгани учун суд қилган.
Плакат муаллифи Федоров мудофаа вазири сифатида бор-йўғи ярим йил ишлагани, унинг фаолиятини эса самарали деб ҳисоблашини айтган. Шу сабабли у Зеленскийдан Федоровни аввалги лавозимига қайтаришни талаб қилмоқда.
Ветеранлар ишлари вазирини алмаштириш талаб қилинмоқда
Акцияда ветеранлар ишлари бўйича вазир Виталий Кимга нисбатан ҳам эътирозлар билдирилган.
«Бу вазирликка ветеран керак» деган плакат кўтарган намойишчи қиз Ким аввал ветеранларни қўллаб-қувватлаш соҳасида ўзини намоён қилмаганини айтган.
Унинг фикрича, Ветеранлар ишлари вазирлигини ҳарбий хизматдан қайтганларнинг муаммоларини биладиган ва уларни самарали ҳал эта оладиган шахс бошқариши керак.
Намойишчилар акциялар сусайганини рад этмоқда
DW суҳбатлашган намойишчилар иштирокчилар сони кун сайин камайиб бораётганига қарамай, акциялар «сусайиб бормоқда» деган фикрга қўшилмаган.
Уларнинг айтишича, узоқ давом этаётган намойишлар туфайли айрим иштирокчилар майдонга ҳар куни келмаяпти. Шунга қарамай, улар ўз талаблари бажарилмагунча акцияларни давом эттиришга тайёр эканини билдирган.
«Ёпиқ эшиклар ортидаги тайинловлар бас қилинсин!» деган плакат кўтарган аёл ҳам ҳукуматнинг сўнгги қарорларидан норози эканини айтган.
Унинг фикрича, Михаил Драпатийнинг Украина Қуролли кучлари бош қўмондони этиб тайинланиши айрим фуқароларнинг норозилигини юмшатган. Бироқ Федоровни мудофаа вазири лавозимига қайтариш талаби ҳамон сақланиб қолмоқда.
Намойишчи, шунингдек, мамлакатда муҳим қарорларни қабул қилиш тизими шаффоф бўлиши кераклигини таъкидлаган.
Федоров 16 июл куни лавозимидан олинган
Михаил Федоров 16 июл куни Украина мудофаа вазири лавозимидан озод этилган. Бу қарор жамиятнинг бир қисми, жумладан айрим ҳарбий хизматчилар орасида танқидларга сабаб бўлган.
22 июл куни эса Володимир Зеленский қарори билан Александр Сирский Украина Қуролли кучлари бош қўмондони лавозимидан олинган. Унинг ўрнига Қуруқликдаги қўшинларнинг собиқ қўмондони Михаил Драпатий тайинланган.
Зеленский Федоровга бир нечта муқобил лавозимларни, жумладан ҳарбий инновациялар бўйича бош вазир ўринбосари лавозимини таклиф қилганини маълум қилган.
Федоров эса фақат мудофаа вазири лавозимига қайтишга тайёр эканини билдирган.
