Қозоғистон президенти Қосим-Жўмарт Тўқаев Украинадаги жанговар ҳаракатларни тўхтатиш керак деб ҳисоблайди. У бу ҳақда Омскда Россия президенти Владимир Путин билан учрашуви чоғида айтди.
«Бу низонинг сабаби кўпчилик учун, жумладан биз учун ҳам тушунарсиз. Айтайлик, Озарбойжон ва Арманистон ўртасидаги “музлатилган” низонинг келиб чиқиш сабаби аниқ. Бунинг илдизи тарихга бориб тақалади. Лекин бу ердаги низо мутлақо тушунарсиз. Балки низони “музлатиш” ва Истанбул 2.0 формуласига қайтиш керакдир, чунки ўшанда сезиларли натижаларга эришилганди», — деди Тўқаев.
Шу билан бирга, у Қозоғистон можарони ҳал қилишда воситачилик қилмаслигини таъкидлади.
«Қозоғистон тарафдор мамлакат эмас, лекин шу билан бир вақтда чақириқларга қарамасдан, воситачилик қилишни қатъиян рад этаман. Россия кун тартибидаги барча масалаларни воситачиларсиз ҳам ҳал қила олади», — деди Қозоғистон президенти.
