«Фрайбург» – «Астон Вилла» 0:3
Голлар: Тилеманс, 41 (0:1). Буэндия, 45+3 (0:2). Роджерс, 58 (0:3)
«Фрайбург»: Атуболу, Линҳарт (Розенфелдер, 61), Гинтер, Трой, Кюблер (Макенго, 73), Эггештайн, Ҳефлер (Ҳелер, 61), Манзамби, Грифо (Шерҳант, 73), Бесте (Гунтер, 86), Матанович
«Астон Вилла»: Мартинес, Конса, Пау Торрес (Мингс, 88), Дин (Матсен, 81), Кэш, Линделёф (Онана, 66), Тилеманс (Дуглас Луис, 88), Роджерс, Буэндия (Санчо, 81), Макгинн, Уоткинс
Огоҳлантиришлар: Трой, 5 – Буэндия, 15. Кэш, 21. Макгинн, 84
Унаи Эмери бунгача беш марта Европа Лигаси финалларида қатнашган. Ва шундан тўрттасида ғолиб чиққан («Севиля» билан уч марта, «Вилярреал» билан бир марта. «Арсенал» билан финалга чиққанида эса «Челси»га ютқазган).
«Фрайбург»га қарши бу сафарги финалда ҳам унинг жамоаси фаворит эди: финалга чиққан жамоаларнинг молиявий имкониятлари ҳам, таркибдаги футболчилар даражаси ҳам бир-биридан узоқ эди. «Астон Вилла» захира ўриндиғидаги футболчиларнинг кўпчилиги «Фрайбург»нинг асосий таркибига кира олган бўларди. Немислар жамоаси бошланғич таркибидан ўз тарбияланувчиларидан етти нафари ўрин олганди. Ўйиндаги илк зарбани айнан немислар жамоаси етакчиларидан бири Матанович йўллади. Бу зарба у қадар хавфли чиқмади. Роджерснинг жавоб зарбасини қайтариш учун эса дарвозабон Атуболу ўз маҳоратини ишга солиши талаб этилди.
Шундан кейин «Фрайбург» ташаббусни тўлиқ топширди. Ўз бу жамоа Бундеслигада ҳам тўпга эгалик қилиш бўйича мақтана олмайди. Юлиан Шустер шогирдлари тўпни жарима майдонига қанотлардан ва стандарт вазиятлардан етказиб беришга урғу қаратади. Айнан шундай узатмалардан биридан кейин Ҳефлер тўп учун курашда ютиб чиқди ва олис бурчак томон хавфли зарба йўллади, аммо зарбага аниқлик етишмади.
Майдонда рақиблар бир-бирини аямай яккакурашларга киришди ва 20-дақиқагача бош ҳакам чўнтагидан уч марта сариқ карточкасини чиқаришига тўғри келди. Бу карточкалардан бири қизил бўлиши ҳам мумкин эди, аммо Мэтти Кэш Грифога қарши ўта қўпол ҳаракат қилганида оғир жазодан қутулиб қолди.
Умуман, 40-дақиқагача жамоалар анча эҳтиёткорлик билан ҳаракат қилди ва рискка бормади. «Вилла»нинг бу вақт оралиғидаги тўртта зарбасидан иккитаси ҳимоячилар томонидан тўсилди.
41-дақиқада эса инглизлар бурчак зарбасини аъло даражада ижро этишди. Бу уйда тайёрланган вазифа эди: тўп ердан ўйналди, Роджерс тўпни жарима майдони ташқарисида бўш турган Тилемансга оширди ва белгиялик яримҳимоячи тўпни тўхтатмасдан кучли зарба йўллади.
