«Пари Сен-Жермен» (Франция) ва «Астон Вилла» (Англия) УЕФА суперкубогида тўқнаш келди.
Аввалига француз клубидан Хвича Кварацхелия 20-дақиқада ҳисобни очди, 45-дақиқада эса инглиз жамоасидан Брайан Маджо ҳисобни тенглаштирди. 61-дақиқада эса Дезире Дуэ яна «Пари Сен-Жермен»ни ҳисобда олдинга олиб чиқди.
Шундай қилиб, «Пари Сен-Жермен» рақибини 2:1 ҳисобида мағлуб этди ва кетма-кет иккинчи йил суперкубок ғолибига айланди.
УЕФА суперкубогида Чемпионлар лигаси ва Европа лигаси ғолиби куч синашади. Аввалроқ, «ПСЖ» Чемпионлар лигаси финалида Англиянинг «Арсенал» клубини (1:1, пенальтилар сериясида 4:3) мағлуб этган бўлса, Европа лигаси финалида «Астон Вилла» Германиянинг «Фрайбург» жамоасини 3:0 ҳисобида мағлуб этган эди.
Суперкубок 1972 йилдан бери мунтазам равишда ўтказилмоқда. Ҳозирга қадар Испаниянинг «Реал Мадрид» жамоаси уни 6 марта қўлга киритган.
Шунингдек, Испаниянинг «Барселона» ва Италиянинг «Милан» жамоалари 5 марта, Англиянинг «Ливерпуль» клуби 4 марта, Нидерландиянинг «Аякс» ва Испаниянинг «Атлетико Мадрид» жамоалари 3 марта, Англиянинг «Челси», Германиянинг «Бавария», Бельгиянинг «Андерлехт», Испаниянинг «Валенсия» ва Италиянинг «Ювентус» жамоалари 2 мартадан кубокни қўлга киритган.
