Саудия Арабистонининг «Ан-Наср» клуби ҳужумчиси Криштиану Роналду Лионел Мессининг Аргентина миллий жамоасидаги фаолиятини якунлашига бағишланган постига изоҳ қолдирди.
«Лео, шунча йил мамлакатинг шарафини ҳимоя қилдинг — сенинг тарихинг хотираларда абадий қолади. Аргентина билан эришган барча ютуқларингни чин дилдан ҳурмат қиламан. Қучоқлаб қоламан», — деб ёзди португалиялик футболчи.
Месси 7 октябрга ўтар кечаси Аргентина терма жамоасидаги хайрлашув ўйинини ўтказди. Буэнос-Айресда Бенинга қарши бўлиб ўтган ўртоқлик учрашуви мезбонларнинг 3:0 ҳисобидаги ғалабаси билан якунланди. 39 ёшли ҳужумчи пенальтидан гол урди ва иккита голли узатмани амалга оширди.
Месси миллий жамоа сафида жами 208 та учрашувда 126 та гол урган ва 70 та голли узатма берган.
Роналду аввалроқ ҳам Мессининг отасидан айрилгани ҳақидаги постига изоҳ ёзиб, ҳамдардлик билдирганди. Ушбу изоҳ ҳозиргача 7,2 млн «лайк» тўплаган ва Instagram тарихида энг кўп «лайк» йиғган изоҳ бўлиб турибди.
