1958 йилги финалда Пеле кийган футболка миллионлаб долларга сотилди

Sothebyʼs аукцион уйи маълумотига кўра, гап 1958 йил Швецияда бўлиб ўтган Жаҳон чемпионати финалида Пеле кийган Бразилия терма жамоасининг кўк рангли, орқа қисмида 10-рақам туширилган футболкаси ҳақида кетмоқда.

Ўша пайтда атиги 17 ёшда бўлган Пеле (Эдсон Арантис ду Насименту) ўзининг илк жаҳон чемпионатида иштирок этган ва айнан шу мусобақада Бразилияни тарихидаги илк жаҳон чемпионлигига олиб чиққан.

Аукцион уйининг таъкидлашича, мусобақадан кейин Пеле мазкур футболкани жамоадоши Дида (Эдвалдо Алвес де Санта Роза)га совға қилган. Дида чемпионатнинг дастлабки ўйинларида 10-рақамли футболкани ўзи кийиб майдонга тушган. Бироқ гуруҳ босқичининг учинчи турида СССР терма жамоасига қарши баҳсда Пеле гол ургач ва асосий таркибдан мустаҳкам ўрин олгач, техник хатолик туфайли айнан шу рақамли футболка унга бериб юборилган. Кейинги барча учрашувларда Пеле шу либосда майдонга тушган.

Маълум қилинишича, Пеле ва Дида жаҳон чемпионати давомида бир хонада яшаган. Мусобақадан кейин Дида футболкани оиласига топширган. Кейинчалик, 1993 йилда у туғилган шаҳри Масейодаги Спорт музейига берилган. Музей эса 2004 йилда ушбу футболкани Christieʼs аукциони орқали сотган. Шундан бери у хусусий коллекцияда сақланиб келган. Янги харидорнинг шахси эса ошкор этилмаган.

1958 йилги жаҳон чемпионатида Бразилиянинг кўк рангли формада ўйнаши ҳам қизиқ воқеалардан бири ҳисобланади. Мусобақа мезбони Швеция терма жамоаси ҳам сариқ рангли либосда майдонга тушгани учун ташкилотчилар бразилияликлардан анъанавий сариқ формасидан воз кечишни талаб қилган. Шу боис Бразилия футболчилари кўк футболкада ўйнашга қарор қилган.

Қолаверса, ўша даврда форма тайёрлаш жараёни ҳам бугунгидан анча фарқ қилган. Футболчилар Бразилия футбол конфедерацияси эмблемаси ва рақамларни футболкаларга ўзлари тиккан. Рақамлар учун ишлатилган сариқ мато эса спорт анжомлари ташилган қоплардан кесиб олинган.

Сотилган айнан шу футболкада Пеле Швецияга қарши финал баҳсини тўлиқ ўтказган ва икки гол муаллифига айланган. Ўша учрашувда Бразилия 5:2 ҳисобида ғалаба қозониб, ўз тарихида илк бор жаҳон чемпиони бўлган.

Аукцион уйи маълум қилишича, мазкур футболканинг ҳақиқийлиги Дидадан ташқари ўша чемпион жамоанинг яна уч нафар аъзоси — Нилтон Сантос, Орландо Пеканя ва Марио Загалло томонидан ҳам тасдиқланган.

Айни пайтда Пеленинг мазкур футболкаси аукционлар тарихида энг қиммат нархда сотилган иккинчи футболка ҳисобланади. Биринчи ўрин эса Аргентина афсонаси Диего Марадонанинг 1986 йилги жаҳон чемпионати чорак финалида Англия дарвозасига машҳур голини урган ўйинда кийган футболкасига тегишли. У 2022 йилда Sothebyʼs аукционида 9,28 миллион долларга сотилган.