Оҳангарон туманида жойлашган, кунига тахминан 3,5 минг тонна чиқинди қабул қиладиган чиқинди полигонида бир неча кун аввал йирик ёнғин содир бўлди. Расмийлар ҳодисани ҳаво ҳароратининг кескин кўтарилиши билан изоҳламоқда. Бироқ Kun.uz суҳбатлашган воқеа гувоҳлари ва маҳаллий аҳоли бутунлай бошқа манзарани тасвирлади. Уларнинг таъкидлашича, бу ерда чиқиндилар биринчи марта ёнмаяпти ва ёнғинлар, асосан, тунги вақтда кузатилади.
“Чиқинди кўплиги учун ёқиб юборишяпти деб ўйлайман”
“Кундузи ҳеч қандай тутун бўлмайди. Айнан кечқурун олов чиқади, кенглиги 100 метр, баландлиги 200-300 метр баландликда қип-қизил бўлиб ёнади. Заводда кечки сменада хитойлик ва ўзимизнинг ўзбек ишчилар ишлайди. Битта сменада 8-9 та ниқоб алмаштиришга мажбур бўлишади. Хонага (ишдан кейин) келган пайтида усти тўла кул бўлади, ёнадиган жой узоқ, лекин уст-бош тутун бўлади. Бу ёқда Наврўз қишлоғи бор, шу қишлоқдаги маҳаллий аҳолигача боради тутун. Бу ёғи Қизилтоғ кўпригигача боради. Шамол бўлган кунлари ишчилар бемалол ишлашади, чунки шамол тутунни Тошкент шаҳри томонга олиб кетади. Кечаси 22:30 дан эрталабки 8:00 гача тутун бўлади.
Бир куни қарасам “Лабо” турибди, орқасида солярка тўла канистр бор. Бу (ёнғин) махсус уюштирилган. Чиқинди кўплиги учун ёқиб юборишяпти деб ўйлайман. Агар табиий офат бўлса, куннинг иссиғида ёниши керак, кечаси эмас. Чиқинди кўпайганидан кейин техникаларни камайтириш мақсадидами, техника ишлатмаслик мақсадидами, ёқиб юборишга қарор қилинган бу”, - дейди шу ҳудуддаги завод қурилишида ишлаётган ишчилардан бири.
Яна бир ишчининг айтишича, тутун фақат ноқулайлик эмас, балки соғлик учун ҳам хавф туғдирган.
“Кўз очиб бўлмайди, томоқ, бурун ачишиб кетади. 1-2 та ишчилар қайт қилиб йиқилди ҳам. Кейин уйига жўнатиб юборишга мажбур бўлдик”.
“Эшик-ойналарни ёпиб ётишга мажбур бўламиз”
Бу иддаолар ҳозирча расман тасдиқлангани йўқ. Аммо Экология ва иқлим ўзгариши миллий қўмитаси маълумотлари ёнғин фақат бир кун юз бермаганини тасдиқлайди. Қўмитага кўра, 10 июл куни ёнғин аниқлангач, полигон раҳбари маъмурий жавобгарликка тортилган ва ёнғинни зудлик билан бартараф этиш бўйича мажбурий кўрсатма берилган. Бироқ экополиция ўтказган қайта текширувда ушбу кўрсатма бажарилмагани, кейинги кунлар ҳам ёнғин давом этаётгани қайд этилган.
Шу билан бирга, Чиқиндиларни бошқариш ва циркуляр иқтисодиётни ривожлантириш агентлиги мазкур ҳолатни “табиий ёнғин” сифатида баҳолаган.
