Жаҳон чемпиони, италиялик афсонавий футболчи Андреа Пирло энди Италия миллий жамоаси бош мураббийлиги учун номзод эмас. Унинг ўзи бу ҳақда инстаграмдаги сторисида маълум қилди, лекин бунинг сабабини очиқламади.
Пирло Малдинининг номзоди эди
Футбол бўйича Италия миллий жамоаси 2026 йилги жаҳон чемпионатига йўлланма ололмагач, бош мураббийсиз қолганди. Италянлар ўтиш босқичида Босния ва Ҳерцеговинага пеналтилар сериясида ютқазди. Шу тариқа, жамоа қаторасига учинчи мундиални ўтказиб юборадиган бўлди.
Бу муваффақиятсизликдан кейин дастлаб жамоа бош мураббийи Женнаро Гаттузо истеъфога чиқди, унинг ортидан Италия футбол федерацияси (FIGC) президенти Габриэле Гравина ҳам ишдан кетиб, унинг ўрнини Жованни Малаго эгаллади, техник директор лавозимига эса Италия футболи афсоналаридан бири Паоло Малдини таклиф этилди, яна бир собиқ футболчи Леонардо эса унга маслаҳатчилик қиладиган бўлди.
Маҳаллий нашрларга кўра, Малаго миллий жамоа бош мураббийлиги учун Карло Анчелотти, Пеп Гвардиола ва Роберто Манчини номзодларини кўриб чиққан. Улардан биринчиси Бразилия миллий жамоаси билан банд, иккинчиси таклифни рад этган, Италияни 2020 йилги Европа чемпионати ғолиби қилган Манчинининг номзодига эса Малдини қарши чиққан – унинг танлови ўтмишда «Интер», «Милан» ва «Ювентус» клубларида тўп сурган ва 2006 йил Италия миллий жамоаси билан жаҳон чемпионига айланган Андреа Пирло эди.
Аммо дам олиш кунлари Италиядаги нашрлар Пирлонинг Россиядаги «Фонбет» букмекерлик компанияси билан шартномаси борлиги ва бу унинг миллий жамоа бошқарувига тайинланишига тўсқинлик қилиши мумкинлиги ҳақида ёза бошлади. Пирло ушбу компания амбассадорига айлангани ҳақида 2025 йил октябрида расман эълон қилинганди. Ўтган вақт мобайнида у букмекерлик идорасининг бир неча реклама кампанияларида иштирок этди. Жумладан, 2026 йил майида Пирло (италиялик яна бир собиқ футболчи Марко Матерацци билан бирга) Москвага келиб, хайрия ўйинида иштирок этди, мухлисларга имзо тарқатди ва улар билан мулоқот қилди. Бундан ташқари, у «Ой, что ни вечер, то футбол» қўшиғи ролигида суратга тушди, бу ролик ЖЧ-2026 ўйинлари вақтида «Матч ТВ» телеканалида мунтазам намойиш этилди.
Бундан ташқари, мамлакатда қимор ўйинларига жуда эҳтиёткорона муносабатда бўлишади. Масалан, 2019 йилдан бошлаб А Серияда клублар ўз формаларида букмекерлик идоралари рекламасини жойлаштириши тақиқланган.
La Gazzetta dello Sport газетаси Пирло Италия миллий жамоаси бош мураббийлиги учун асосий номзодга айлангач, унинг Россия букмекерлик компанияси билан алоқаси мамлакатда сиёсий мунозаралар келтириб чиқаргани ҳақида ёзди. Хусусан, Пирлони бу лавозимга тайинлаш ғоясини италиялик сиёсатчи, Европарламент раиси ўринбосари Пина Пичерно кескин танқид қилган:
Пирло ажойиб чемпион эди. Аммо мураббий сифатида у ҳозирча кўп нарсага эришмаган. Ва шунчаки эътиборсиз қолдириб бўлмайдиган яна бир мавзу бор. Италия миллий жамоаси дунёда Италияни ифода этади. Италия эса Украина, Евроиттифоқ ва халқаро ҳуқуқ томонида. <...> Пирло россияпарастми ёки йўқми, бунинг аҳамияти йўқ. Муҳими шундаки, у онгли равишда ва бир неча бор ўз авторитетини Путин режимини нормаллаштириш операцияси учун тақдим этиб, Украинани бомбардимон қилиш пайтида Кремл пропагандаси фойдаланган тадбирларда иштирок этди. Бу шунчаки футбол ўйини эмас, балки Москва ҳеч нарса бўлмагандек давом этиши мумкинлигини кўрсатишга уринаётган стратегиянинг бир қисми эди.
«Ҳаракат» партияси вакили Карло Календа ҳам шунга ўхшаш фикр билдирган.
«2022 йилдан кейинги даврда Россияни қўллаган одам расмий давлат лавозимларини эгалламаслиги керак», – деб ҳисоблайди у.
Бу фонда Пирлонинг мураббийликка тайинланиш жараёнида тўхталиш юз берди. La Gazetta dello Sport Пирлонинг номзодига эътирозлар у букмекерлик идораси билан ҳамкорлик қилгани учун эмас, балки Россия компанияси билан ҳамкорлик қилгани учунлигини қайд этди.
Пирлонинг ўзи 26 июл куни ижтимоий тармоқдаги саҳифасида бўлаётган воқеалар юзасидан изоҳ берди:
Фаолиятим давомида, аввал футболчи сифатида, энди эса мураббий сифатида, мен ҳар доим имзоланган шартномалар ва ишлаган мамлакатларим қонунларига тўлиқ мувофиқ ҳаракат қилдим. Яқинда рўй берган можаро марказида бўлган профессионал ҳамкорлик БААдаги фаолиятим контекстида пайдо бўлган ва фақат тижорат ва спорт билан боғлиқ. Бу ҳамкорликка сиёсий маъно бериш мен ҳеч қачон айтмаган ва менга хос бўлмаган эътиқодларни менга нисбат қилиш демакдир.
Спортга оид қарорни тезда жамоатчилик муҳокамасига тортишгани, натижада менга хос бўлмаган истак ва ниятлар қўшиб ёзилгани учун афсусдаман. Италияга бўлган муҳаббатим лавозимга боғлиқ эмас. Бу менинг тарихимнинг, шахсиятимнинг бир қисми ва у доимо мен билан бирга бўлади.
Бироз ўтиб у энди Италия миллий жамоаси бош мураббийи лавозими учун номзод эмаслигини маълум қилди.
Кеча кечқурун Италия миллий жамоасига мураббий бўлмаслигимни англадим.
Бунинг ортидан Италия футбол федерацияси техник директори Паоло Малдини ва унинг маслаҳатчиси Леонардо истеъфо берди. Хабарларга кўра, икки ҳафта олдин бу лавозимга келган Малдини бош мураббийни айнан ўзи танлашини шарт қилиб қўйганди. Энди бу лавозимга бошқа бир собиқ футболчи, Жоржо Киеллини келиши кутилмоқда.
