Греция Россия фуқароларига Шенген визаларини бериш бўйича чекловларни кучайтирди. Бу ҳақда Россия Туроператорлари ассоциацияси маълум қилди.
Ассоциация маълумотларига кўра, айрим россиялик туроператорлар орқали ҳужжат топширган мижозларнинг қарийб ярмига Греция визаси бериш рад этилган. Мустақил равишда мурожаат қилган сайёҳлар орасида эса рад жавоблари янада юқори бўлиб, баъзи ҳолларда 70 фоизгача етган.
Туроператорларнинг таъкидлашича, ҳатто сафар учун тўловни тўлиқ амалга оширган, меҳмонхона бронлари тасдиқланган туристлар ҳам виза ололмаяпти. Нашр мисол сифатида Москвада кўчмас мулкка эга бўлган ва молиявий ҳужжатлари талабларга тўлиқ жавоб берган мурожаатчининг ҳам қайтадан рад жавобини олганини келтирган.
Россиялик туризм компаниялари бундай кўламдаги рад этишлар аввал кузатилмаганини билдирмоқда. Уларнинг айтишича, Греция томонидан қабул қилинаётган бундай қарорларнинг аниқ сабаби ҳозирча маълум эмас.
Расмий статистикага кўра, 2025 йилда Греция Россия фуқароларига тахминан 59 минг Шенген визасини берган. Уларнинг 41,6 фоизи кўп марталик визалар бўлган. Шу билан бирга, аризаларнинг 11,2 фоизи рад этилган бўлиб, бу кўрсаткич Шенген ҳудуди мамлакатлари бўйича ўртача 6,4 фоизлик даражадан анча юқори ҳисобланади.
Умуман олганда, 2025 йилда Россия фуқаролари 620 мингдан ортиқ Шенген визасини олган. Бу 2024 йилга нисбатан 10 фоизга кўпдир. Виза учун берилган аризалар сони ҳам 8,4 фоизга ошиб, 674 мингтага етган.
Бироқ Европа комиссияси томонидан қоидалар қатъийлаштирилгач, россияликларга берилаётган кўп марталик визалар улуши кескин камайган. Агар аввал берилган визаларнинг тахминан 57 фоизи кўп марталик бўлган бўлса, янги чекловлардан кейин бу кўрсаткич 12 фоизгача тушган.
2025 йилда Россия фуқароларининг Шенген визаси учун берган аризаларининг қарийб тўртдан уч қисми Франция, Италия ва Испания ҳиссасига тўғри келган. Барча берилган визаларнинг 68 фоизи ҳам айнан шу уч давлат томонидан расмийлаштирилган. Хусусан, Франция россияликларга берилган визалар сонини қарийб 30 фоизга оширган бўлса, Италияда бу кўрсаткич пасайган, Испанияда эса деярли ўзгаришсиз қолган.
Европа комиссияси 2025 йил ноябр ойида хавфсизлик омиллари ва Украинадаги уруш билан боғлиқ вазиятни инобатга олган ҳолда Россия фуқароларига кўп марталик Шенген визаларини беришни чеклаш тўғрисида қарор қабул қилган эди. Туроператорлар фикрича, айнан шу чекловлар россияликларнинг қисқа муддатли визалар учун тез-тез мурожаат қилишларига сабаб бўлмоқда.
