Январ ойи охирида Aviator савдо марказида йирик ёнғин юз берган ҳамда ҳодисадан сўнг вайроналар остидан 2 ёш-у 7 ойлик қизчанинг жасади топилган. Ҳолат юзасидан қўзғатилган жиноят иши ЖИБ Янгиҳаёт туман судида кўриб чиқилмоқда. Kun.uz журналисти 28 июлда ўтказилган суд мажлисида қатнашди. Унда гувоҳларнинг кўрсатмалари тингланди.
ЖИБ Янгиҳаёт туман судида Aviator савдо марказидаги ёнғин юзасидан қўзғатилган жиноят иши биринчи инстанцияда кўриб чиқилмоқда. Kun.uz журналисти суд мажлисида қатнашди.
Кимлар судланмоқда?
Aviator’даги йирик ёнғин бўйича 4 киши – бино эгаси, бинога эгалик қилувчи МЧЖ раҳбари, бинодан ижарага жой олиб, болалар майдончаси ташкил қилган МЧЖ таъсисчиси ва норасмий раҳбари судланмоқда. Уларнинг 3 нафарига қамоқ, бирига эса гаров эҳтиёт чораси қўлланган.
Судланувчилар нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш (ЖК 192-11-моддаси 2-қисми “а” банди), ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш (ЖК 227-моддаси 2-қисми “а” банди), ёнғин хавфсизлиги қоидаларини бузиш (ЖК 259-моддаси 2-қисми “а, б” бандлари) жиноятларида айбланмоқда.
Иш бўйича 10 киши жабрланувчи бўлиб ўтган.
“Яхши уланмаган симлар қизийди” – эксперт
Суд мажлисида иштирок этган эксперт ўз кўрсатмасида воқеа жойидан олинган ва экспертизага тақдим қилинган электр симларида “скрутка”, яъни симларни бураб улаш ҳолатлари аниқланганини айтди.
“Экспертизага тақдим қилинган материалларда, яъни ўша симларда, ўзимизнинг тилда “скрутка” деймиз, шундай уланишлар бўлган. Контакт яхши бўлмаса, симлар қизишни бошлайди ва шу сабабли ёнғин чиқиши мумкин”, деди у.
Айблов хулосасида келтирилган экспертиза хулосасида ҳам электр симларининг бураб уланган жойлари ва улардаги контактлар суст бўлгани қайд этилган. Хулосада ёнғин электр кабелларидаги қисқа туташув ёки юқори ўтувчи қаршилик каби авария ҳолатлари оқибатида келиб чиққан бўлиши мумкинлиги кўрсатилган. Бироқ экспертлар ёнғиннинг келиб чиқиш сабабига қатъий жавоб бериш имкони бўлмаганини ҳам қайд этган.
Гувоҳлар нима демоқда?
28 июл куни ўтказилган суд мажлисида гувоҳларнинг кўрсатмалари тингланди.
Айблов хулосаси ва гувоҳларга кўра, савдо марказида йирик ёнғин юз беришидан бироз аввал болалар ўйингоҳига яқин жойдаги чиқинди идишида “тутун чиққан”. Ишчилар оловни ўчириб, чиқиндиларни тозалаган. Бироқ ҳодисанинг келиб чиқиш сабаби аниқланмаган ва бу ҳақда ФВБга хабар берилмаган. Асосий ёнғин шу куни соат 15:45 атрофида болалар ўйингоҳи ҳудудида юз бергани қайд этилган.
Суд мажлисида сўралган икки гувоҳ йирик ёнғиндан бироз аввалроқ болалар ўйингоҳи яқинидаги чиқинди идишида “тутун чиққанини” маълум қилди. Улардан бири “5-6 пакет”, бошқаси эса “бир пакет” чиқинди бўлганини айтди.
Болалар ўйингоҳида ишлаган ходимлардан бири шахсини очиқламаслик шарти билан Kun.uz’га интервю берди.
“Ёнғинни ёнимдаги ходим билан кўрдик. У менежерни чақириш учун югурди, лекин ўша пайтда масъуллар иш жойида йўқ эди. Биз ва ота-оналар болаларни олиб чиқишни бошладик. Менежер келгунига қадар ўйингоҳнинг катта қисми ёниб бўлган эди”, дейди у.
Унинг қўшимча қилишича, биринчи кичик ёнғиндан кейин одамлар эвакуация қилинмаган ва ўт ўчирувчилар чақирилмаган. Катта ёнғиндан сўнг раҳбарлардан бири ходимларга аввалги ёнғин ҳақида гапирмаслик ва олов шифт томондан бошланганини айтишни буюрган.
“Тутунда ҳеч нарсани кўриб бўлмади”
Kun.uz ёнғинда ҳалок бўлган Мунисанинг онасига ҳам микрофон тутди. У ўша куни икки қизини ўйингоҳга олиб борган. Ёнида қўшнилари ва уларнинг ҳам икки боласи бўлган.
Ҳодиса вақтида уч аёлдан бири болалар олдида, иккиси ўйингоҳ ёнидаги овқатланиш нуқтасида ўтирган.
“Кимдир столни қаттиқ уриб, ёнғин бўлаётганини айтди. Ўйингоҳ томонга қараганимда ҳамма жой қоп-қора тутун бўлиб, тепадан қора тутун тушиб келаётган эди. Ёнимдаги боламни кўтариб, ўйингоҳ томонга югурдим. Бир қадам ташлаб, иккинчисини қўймасдан чироқлар ўчди. На сигнализация ишлади, на тепадан сув сепиш тизими ишга тушди.
Ичкари қоп-қоронғи, тутун эса одам одамни кўрмайдиган даражада қалин эди. Қизим югуриб чиқаётган болалар орасидадир, деб қарадим. Ҳатто “спичка” ёқилса ҳам, унинг ёруғлиги кўринмайдиган даражада эди”, дейди аёл.
Она кичкина қизини тополмаган. Ҳодиса жойига етиб келган турмуш ўртоғи фарзанди ичкарида қолганини айтиб, бинога кирган ва қарийб бир соат давомида уни қидирган.
“У ерда жуда кўп бола бор эди. Наҳотки, шунча боланинг орасида фақат менинг болам қолиб кетган бўлса, деб ҳалигача ўзимга савол бераман. Менинг болам учун ким жавоб беради? Ким айбдор? Мен бу дард билан бир умр яшайман”, дейди Мунисанинг онаси.
Оила ҳодисага алоқадор барча ҳолатлар тўлиқ ўрганилиши, масъул шахсларнинг ҳаракатларига ҳуқуқий баҳо берилиши ва қонунда белгиланган чора кўрилишини кутмоқда.
Aviator иши
2026 йил 31 январ куни пойтахтнинг Яшнобод туманидаги Aviator савдо мажмуасида йирик ёнғин чиққанди. 1,5 соат давом этган ёнғинни ўчиришга бевосита Фавқулодда вазиятлар вазири бош-қош бўлган эди.
Ёнғиндан сўнг олиб борилган дастлабки ўрганиш ишларида вайроналар остида бир кишининг жасади топилди. Кейинчалик ёнғин юзасидан жиноий иши очилди.
