Reuters агентлиги Қозоғистон Энергетика вазирлигига таяниб хабар қилишича, томонлар Россиядан келтирилган нефтни Қозоғистонда қайта ишлаш, олинган нефт маҳсулотларининг бир қисмини мамлакат ички бозорида сотиш ҳамда қолган қисмини Россияга экспорт қилиш имкониятларини муҳокама қилмоқда.
Вазирлик маълумотларига кўра, музокаралар давом этмоқда. Бироқ қайта ишланадиган нефт ҳажми, ҳамкорлик шартлари ва қайси нефтни қайта ишлаш заводлари иштирок этиши ҳозирча маълум қилинмаган.
Бундан аввал Reuters Россияда юзага келган ёнилғи танқислиги фонида Москва Қозоғистон билан 50 минг тонна бензин етказиб бериш бўйича ҳам музокаралар ўтказаётганини хабар қилган эди.
Агентлик қайд этишича, 2026 йил ёзида Россия Украинага қарши уруш бошланганидан буён энг жиддий ёнилғи танқислигига дуч келган. Бу ҳолат Украина дронларининг Россия нефт омборлари ва нефтни қайта ишлаш заводларига берган зарбалари фонида юзага келган.
Reuters баҳосига кўра, ушбу ҳужумлар натижасида Россиянинг нефтни қайта ишлаш қувватларининг қарийб 25 фоизи тўлиқ ёки қисман ишдан чиққан. Оқибатда мамлакатнинг айрим ҳудудларида ёқилғи сотувига чекловлар жорий этилган.
