Хитойнинг Sealegend Shipping юк ташиш компанияси Арктика орқали Европага мунтазам контейнер ташувларини йўлга қўйишини маълум қилди. Компания эълон қилган жадвалга кўра, 12 августдан 27 октябргача бўлган навигация мавсумида еттита кичик ва ўрта синфдаги контейнер кемаси иштирокида саккизта рейс амалга оширилади.

Бу лойиҳа ўтган йили амалга оширилган муваффақиятли синов рейсининг давоми ҳисобланади. Ўшанда Istanbul Bridge контейнер кемаси Хитойнинг Нинбо портидан Буюк Британиядаги Феликстоу портига тахминан 20 кунда етиб борган ва компания буни мазкур йўналиш учун рекорд натижа сифатида баҳолаган.

Авваллари Шимолий денгиз йўли орқали контейнер ташувлари асосан синов ёки бир марталик рейслардан иборат эди. 2026 йилги дастур эса навигация мавсуми давомида ҳар ҳафта кема жўнайдиган тўлиқ мунтазам контейнер хизмати йўлга қўйилишини назарда тутади.

Илк рейсни Dubai Tower контейнер кемаси амалга оширади. 1 740 TEU сиғимга эга ушбу кема 12 август куни Хитойдан йўлга чиқиб, 5 сентябр куни Буюк Британиянинг Феликстоу портига етиб бориши режалаштирилган. TEU — 20 футлик стандарт контейнер асосида ҳисобланадиган юк сиғими бирлиги ҳисобланади.

Компания маълумотларига кўра, янги йўналиш орқали юклар Германиянинг Гамбург шаҳрига 20–22 кунда етказиб берилади. Бу темирйўл орқали ташиш муддатига яқин бўлса-да, бир вақтнинг ўзида анча кўп юк ташиш имконини беради.

Sealegend Shipping таъкидлашича, Арктика орқали ўтувчи йўналиш Шарқий Осиё билан Шимолий Европа ўртасидаги масофани сезиларли қисқартириши ҳисобидан карбонат ангидрид (CO₂) чиқиндиларини қарийб 50 фоизга камайтириш имконини ҳам беради.

Мутахассислар фикрича, мазкур лойиҳа Хитойнинг «Қутб Ипак йўли» ташаббуси доирасида Арктикадаги иқтисодий ва стратегик иштирокини янада кенгайтиришга хизмат қилади. Агар 2026 йилги навигация мавсуми муваффақиятли ўтса, Шимолий денгиз йўли орқали мавсумий мунтазам контейнер ташувлари келажакда Сувайш канали орқали амалга ошириладиган анъанавий йўналишларга тижорий жиҳатдан муносиб муқобилга айланиши мумкин.