Dpa агентлигининг хабар беришича, гап стратегик эмас, балки нотратегик (тактик) ядровий қуроллар ҳақида бормоқда. Бундай қуроллар асосан қўшинлар, аэродромлар, портлар, қўмондонлик пунктлари ва бошқа ҳарбий инфратузилма объектларига қарши қўллаш учун мўлжалланган. Улар қирувчи самолётлар ёки қанотли ракеталар орқали етказилади ва стратегик ядровий қуролларга нисбатан қуввати пастроқ ҳисобланади.
Бундан аввал НАТО бош котиби Марк Рютте ҳам агентликка берган интервюсида Европада қўшимча АҚШ ядровий қуролларини жойлаштириш эҳтимолини истисно этмаган. Бироқ у бу борадаги музокаралар тафсилотларини очиқламаган.
«Биз ҳеч ким НАТОга ядровий зарба бериб, жавобсиз қолиши мумкин эмаслигига ишонч ҳосил қилишимиз керак», — деган Марк Рютте.
Маълум қилинишича, Совуқ уруш тугаганидан кейин Европа ҳудудида АҚШнинг тахминан 100 та B61-12 туридаги ядровий бомбаси сақланиб қолган. Улар НАТОнинг Nuclear Sharing дастури доирасида Германия, Белгия, Италия, Нидерландия ва Туркиядаги олтита авиабазага жойлаштирилган.
Шу билан бирга, айрим давлатлар қонунчилигида ҳам ўзгаришлар кузатилмоқда. Литва президенти Гитанас Науседа мамлакат НАТОнинг ядровий тийиб туриш тизимига қўшилишга тайёрлигини билдирган, аммо ҳозирча тинчлик даврида мамлакат ҳудудига ядровий қурол жойлаштириш режаси йўқлигини таъкидлаган.
Финландияда эса июн ойи охирида қабул қилинган «Атом энергияси тўғрисида»ги қонунга киритилган ўзгартишлар мамлакат ҳудудига ядровий қурол олиб кириш ва уни жойлаштиришга қўйилган тақиқни бекор қилди. Мазкур ўзгартишлар 1 июлдан кучга кирган.
