Украина Россиянинг Wildberries маркетплейси омборларига ҳужумларни давом эттирмоқда. Бу сафар Ленинград областидаги омборга ҳужум оқибатида ёнғин чиққан. Москва областида ҳам омборлар зарбага учраган – бу ҳақда маҳаллий расмийлар компания номини келтирмасдан хабар берган. Беш киши ҳалок бўлгани маълум.
«Бугун дрон ҳужуми оқибатида округ ҳудудида шикастланишлар қайд этилди. Афсуски, қурбонлар ва яраланганлар бор», – дейилади Москва областининг Чехов округи раҳбари Михаил Собакиннинг эрталабки хабарида. У логистик комплекс биноси шикастлангани акс этган фотони эълон қилган.
Москва области губернатори Андрей Воробёв дастлабки маълумотларга кўра беш киши ҳалок бўлиб, яна 10 киши яраланганини маълум қилган.
«Асосий оқибатлар Чехов муниципал округида қайд этилган. Новоселок саноат зонасида дрон урилиши натижасида ёнғинлар чиққан. Энг жиддийси – омборхонада бўлган, ёнғин ўчоғи аллақачон бартараф этилган – деган губернатор. – Шунингдек, электр нимстанция ва маъмурий бино шикастланган. Ўт ўчирувчилар воқеа жойида ишламоқда».
Солнишково қишлоғида дрон парчалари хусусий уй ва автомобилга зарар етказган, ёнғин ўчирилган, дея қўшимча қилади Москва области раҳбари.
Расмийлар Москва областида ҳужумга учраган омборлар қайси компанияга тегишли эканига аниқлик киритишмаган.
Худди шу вақтда Ленинград областининг Тосненск районидаги Красний Бор посёлкасида Wildberries логистик объекти бўйлаб зарба берилган. «Ёнғинни ўчириш ва ҳужум оқибатларини бартараф этиш ишлари давом этмоқда», – дея маълум қилган компаниядагилар.
Ленинград области губернатори Александр Дрозденко 17 та дрон уриб туширилгани ҳақида хабар берган. «Айни вақтда ёнғин ўчирилган, омбор биносининг бир қисмига сув қуйиш ишлари олиб борилмоқда. Ёнғин тарқалиш хавфи йўқ. Корхонада жабрланганлар йўқ», – деган губернатор.
Гипермаркетларга озиқ-овқат маҳсулотлари тарқатиш билан шуғулланувчи «Лента» компанияси омборида ҳам дрон қулаши оқибатида ёнғин чиққан. Ҳужум оқибатида ишчилардан бири тан жароҳати олиб, шифохонага ётқизилган. Ёнғин ўчирилган. «Тақсимот маркази томонидан хизмат кўрсатилаётган дўконларда товарларнинг етарли захираси шакллантирилган», – дейилади хабарда.
Бу Украина ҳарбийларининг 18 июл куни бошлаган кампанияси доирасида Wildberries терминалларига қилинган 20-ҳужум бўлди.
Бир кун олдин компаниянинг Владимир областидаги комплексига зарба берилганди, икки кун олдин – Самара областида, 31 июл куни – Волгоградда компания омборлари ҳужумга учраганди.
Владимир области губернатори Александр Авдеев сешанба куни тонгида омбордаги ёнғин тўлиқ ўчирилгани ҳақида хабар берди. ТАСС агентлиги маҳаллий расмийларга таяниб берган хабарга кўра, Wildberries’нинг Самара областидаги 160 минг квадрат метр майдонни эгаллаган логистик маркази тўлиқ ёниб кетган.
Твер областида ҳам сешанба кунги ҳужумлар вақтида Wildberries омбори шикастланди, деб хабар берди Твер области губернатори Виталий Королев. «Бугун тунда дронлар ҳужумини қайтариш чоғида Wildberries’нинг Эммаусс қишлоғидаги омборхонасининг девори дрон парчалари билан қисман шикастланган», – дея хабар қилган у. Унинг сўзларига кўра, ходимлар орасида жароҳат олганлар йўқ.
Россия мудофаа вазирлиги 3 август куни соат 20:00 дан 4 август куни соат 8:00 га қадар Россиянинг 18 та ҳудуди, жумладан, Москва области ва Ленинград областида, шунингдек, аннексия қилинган Қримда украинларнинг 320 та дрони «тўхтатилгани ва йўқ қилингани» ҳақида баёнот берган.
Украина ҳозирча сўнгги ҳужумлар юзасидан изоҳ бермади. Сўнгги кунларда Киев Москвани ҳарбий ҳаракатларни тўхтатишга мажбурлаш учун Россиянинг ичкари ҳудудларига дронлар орқали ҳужумларни кучайтирмоқда. Кремл эса Донбассни тўлиқ эгалламагунича, ўт очишни тўхтатмоқчи эмас. АҚШ иштирокидаги тинчлик музокаралари феврал ойида, АҚШ ва Исроил Эронга қарши катта уруш бошлаганидан кейин музлатилган.
