ФИФА президенти Жанни Инфантино халқаро футбол мусобақаларини қисман хусусий инвесторларга бериш режаси атрофидаги баҳсларга қарамай, ўз лавозимини сақлаб қолди. Бу қарор 5 август куни Марокаш пойтахти Работ шаҳрида бўлиб ўтган ФИФА бошқарувининг фавқулодда йиғилишида қабул қилинди.
Йиғилиш якунлари бўйича тарқатилган баёнотда ФИФА бош котиби Маттиас Графстрём ҳамда бошқарув аъзолари Инфантинога тўлиқ қўллаб-қувватлаш билдиргани қайд этилди. Шунингдек, ташкилот ўтган воқеадан тегишли хулоса чиқариши ва ички жараёнларни янада такомиллаштириши таъкидланди.
ФИФА барча миллий ва минтақавий футбол уюшмаларига юборилган расмий мактубда баҳсли режа билан боғлиқ хатолар учун «самимий узр» сўраб, келажакда бундай ҳолатларга йўл қўймасликка ваъда берган.
Мазкур можаро Жанни Инфантинонинг жаҳон чемпионати ва бошқа халқаро мусобақаларнинг тижорат ҳуқуқларининг бир қисмини хусусий инвесторларга сотиш режасини илгари сурганидан кейин бошланган. Оммавий ахборот воситаларида ушбу инвесторлар орасида АҚШ президенти Доналд Трампнинг куёви Жаред Кушнернинг қариндошлари ҳам бўлиши мумкинлиги ҳақида хабарлар тарқалган эди. Инфантино эса бу ташаббус миллий футбол уюшмалари даромадини тўрт бараварга оширишини таъкидлаган.
Бироқ УЕФА мазкур режани кескин танқид қилди. Европа футбол уюшмалари иттифоқи ФИФА раҳбариятини «яширин схемалар»да айблаб, айбдорларни жавобгарликка тортишга чақирди. Ташкилот, шунингдек, Инфантино ўзининг сайловолди ваъдаларини, хусусан, бошқарув шаффофлигини таъминлаш бўйича мажбуриятларини бажармаганини билдирди.
30 июл куни УЕФАга аъзо бўлган 55 та миллий футбол ассоциацияси Инфантино режасини амалга оширган тақдирда ФИФА мусобақаларини бойкот қилишга тайёрлигини маълум қилди. Кейинчалик Шимолий ва Марказий Америка ҳамда Кариб ҳавзаси футбол конфедерацияси (КОНКАКАФ) ҳам Европа томонининг танқидларини қўллаб-қувватлади.
Шундан сўнг, 1 август куни Жанни Инфантино ФИФА халқаро турнирларни қисман хусусийлаштириш режасидан воз кечаётганини эълон қилди. Унинг сўзларига кўра, ташкилот барча томонларнинг фикрини тинглаганидан кейин ушбу лойиҳа футбол ҳамжамиятида кутилганидан кўра кўпроқ келишмовчиликка сабаб бўлганини тан олган.
