У шериклари билан Фарғона шаҳрида фуқародан товламачилик йўли билан 200 минг доллар талаб қилганликда гумонланмоқда.
Фарғона ИИБ ахборот хизмати хабарига кўра, «Мансур Казанский» лақаби билан танилган, уюшган жиноятчиликка алоқадор бўлган Мансур Арипов Тошкент шаҳрида яшовчи шахснинг нотурар жойини 1 млн 200 минг долларга сотиб олган. Ҳисоб-китобни мазкур объектни гаровга қўйиш орқали банк кредити асосида амалга оширишга келишишган.
Ушбу келишув асосида нотурар жой нотариал тартибда Арипов номига расмийлаштирилган. Шундан сўнг у кредит бўйича ойлик тўловлар ва фоизлар билан танишиб, кредит олишдан бош тортган. Аммо у объектни асл эгасига қайтариш ўрнига уни жабрланувчининг номига қайта расмийлаштириб бериш эвазига 200 минг доллар талаб қила бошлаган.
Бундан ташқари, у 1968 йилда туғилган шериги билан бирга жабрланувчининг тадбиркор ҳамкорига ҳам босим ўтказиб, унга нисбатан қораловчи материаллар тўплангани ва жиноий жавобгарликка тортиш билан қўрқитиб, пул беришга мажбурлаб келган.
Фарғона вилояти ИИБ ҳамда ДХХ ходимлари ҳамкорлигида ўтказилган тезкор тадбирда гумонланувчи Фарғона шаҳридаги Бурҳониддин Марғиноний кўчасида жойлашган нотариал идорада нотурар бинони жабрланувчига ўтказиб бериш эвазига 100 минг доллар олаётган вақтида ашёвий далиллар билан ушланган.
Мазкур ҳолат юзасидан Жиноят кодексининг 165-моддаси (товламачилик) билан жиноят иши қўзғатилиб, жиноятга алоқадор шахслар процессуал тартибда ушланган. Ҳуқуқ-тартибот органлари ушбу шахслардан жабр кўрган фуқаролар бўлса, 102 рақамига қўнғироқ қилиб хабар беришни сўраган.
