ФИФА президенти Жанни Инфантино яна бир можаро марказида қолди. Бу сафар – романтика мавзуси. The Telegraph нашри ёзишича, швейцариялик мулозим ташкилотда ишлаган вақтида маъшуқасига УЕФА бюджетидан ҳомийлик қилган.
«Туҳматли айблов»
Британия нашри ёзишича, Инфантино УЕФАда ишлаган чоғида ўз қўли остидаги аёл билан ишқий муносабатлар ўрнатган. Аёлнинг шахси материалда очиқланмаган.
Инфантино ҳомийлигида аёлнинг лавозими кўтарилган, маоши ҳам 30 фоизга ошган. Бу эса ҳамкасблар орасида, жумладан, УЕФАнинг ўша вақтдаги президенти Мишел Платинида саволлар уйғотган. Хабарда айтилишича, айнан Платинининг эътирозидан кейин Жанни маъшуқасини ишдан бўшатишга рози бўлган.
Шу билан бирга, ишдан кетганидан кейин УЕФА томонидан ўша аёлга олти рақамда ифодаланувчи суммада компенсация тўлаб берилган, шунингдек, MBA дастури бўйича бизнес мактабидаги ўқиши молиялаштирилган (йилига 45 минг фунт стерлинг).
Таъкидланишича, Инфантино уни шу соҳада бошқа бир юқори маошли лавозимга ишга жойлаштириш учун ҳам ўз алоқаларидан фойдаланган.
УЕФА вакили The Telegraph билан суҳбатда ўша ходим Инфантино билан муносабатда бўлганини тасдиқлаган, шунингдек, аёлга товон тўланганини тан олган, шу билан бирга, бу тўлов ўша вақтда амалда бўлган стандарт тартиб бўйича амалга оширилганини қайд этган.
«Ҳа, тегишли шахсга ишдан бўшатилганда компенсация берилган, шунингдек, MBA дастури бўйича ўқиш учун пул тўланган. Ҳаммаси ўша пайтда ишдан бўшаётган ходимлар учун амал қилган қоидаларга мос келарди. Улар 2016 йилдан бери кучайтирилган», – дея изоҳлайди The Telegraph суҳбатдоши.
ФИФА эса, аксинча, бу маълумотни қатъиян рад этган. «Президент бу айбловларни қатъиян рад этади. Улар ҳақиқатга мутлақо тўғри келмайди. Номақбул хатти-ҳаракатлар ёки низом ёки қоидаларни бузишга оид ҳар қандай ишоралар туҳмат ҳисобланади. УЕФА ёки ФИФАнинг ҳеч бир ходими ҳеч қачон жаноб Инфантинонинг хатти-ҳаракатлари устидан шикоят қилмаган, чунки у билан боғлиқ ҳеч қандай воқеа содир бўлмаган», – дейди ташкилот вакили.
Маълумот учун, швейцариялик мулозим 2001 йилда уйланган – у рафиқаси Лина Ал-Ашкар билан тўрт фарзандни тарбиялаб келади.
Муаммо ортидан муаммо
Янги можаро Инфантино шусиз ҳам мушкул аҳволда қолган бир пайтда авж олди. ФИФАнинг турнирлар ҳуқуқларини сотиш учун янги тижорат тузилмаси – FIFA Forward Enterprise (FFE)ни ташкил этиш ғояси УЕФА билан ўртада жиддий можаро келтириб чиқарганди. Бу лойиҳага кўра, акцияларнинг бир қисмини хусусий инвесторларга сотиш режалаштирилганди, бу акциялар учун эса Доналд Трампнинг куёвига алоқадор фирма асосий даъвогар сифатида кўрилаётганди.
Бу ғоя кескин эътирозларга сабаб бўлди – кўплаб йири халқаро федерациялар, жумладан, УЕФА, КОНМЕБОЛ ва КОНКАКАФ уни танқид қилиб чиқди. Бунинг натижасида швейцариялик мулозим бу ғоядан воз кечди, аммо аллақачон кеч бўлганди – европаликлар энди унинг истеъфосини талаб қила бошлади.
ОАВ маълумотига кўра, Инфантино энди АҚШ президенти Доналд Трампнинг қўлловидан умид қилмоқда. Аммо ишқий муносабатлар тарихи очилганида у Инфантинога ёрдам қўлини чўзиши даргумон.
