Футбол бўйича Бразилия чемпионатида комедик эпизод рўй берди. А Сериянинг 22-тури доирасида «Шапекоэнсе»га қарши кечган учрашувда (2:1) «Коритиба» клуби ҳимоячиси Жаси ўзи урган голни нишонлаш чоғида реклама тахтаси ортидаги туннелга тушиб кетди. Футболчи чуқурдан қайтиб чиққанидан кейин эса унинг голи офсайд туфайли бекор қилингани маълум бўлди.
«Биз доим ҳам гол уравермаймиз»
Бу ҳолат биринчи бўлим охирида рўй берган. Жаси иккинчи қаватда тўп учун курашда ютиб чиқди ва мавсумдаги иккинчи голини уриб, бу голни фаоллик билан нишонлай бошлади: у тўпни «Шапекоэнсе» дарвозабонидан олиб қўйган ва фарзанд кутаётганига ишора қилиб, тўпни футболкаси ичига солган.
Шундан кейин ҳимоячи рекламалар жойлаштирилган тўсиқдан сакраб ўтган, аммо унинг ортида трибуналар остига олиб кирувчи туннелнинг кириш қисми жойлашганини пайқамай қолган. Бу вақтда танаффус яқинлиги туфайли туннел эшиги очиқ турганди. Натижада футболчи дарҳол кадрдан ғойиб бўлиб, пастга қулаган. Туннелнинг кириш жойида турган хавфсизлик хизмати ходими эса бошини чангаллаганча қолган.
Кейин Жаси туннелдан чиқиб келган ва голни нишонлашда давом этган, аммо кўп ўтмай гол «ўйиндан ташқари ҳолат» туфайли бекор қилинган.
Танаффусдаги интервюсида бразилиялик футболчи аҳволи яхши эканини айтган.
«Мен билан барчаси жойида. Ҳимоячилар камдан кам гол уришади, шунинг учун мен берилиб кетдим. Туннел эса очиқ турган экан. Оёғимни текширтираман», – деган у CazeTV телеканалига берган интервюсида.
Лекин Жаси 48-дақиқада барибир алмаштирилди – йиқилиш чоғида тўпиқдаги лат ейиш барибир сўзини айтган. «Коритиба» эса усиз ҳам ғалаба қозонишни уддалади, Педро Роша ўйин охирида ғалаба голини урди.
Бу биринчиси эмас
«Кото Перейра» стадионида шу каби ҳолат 2014 йилда ҳам рўй берганди: ўшанда «Коритиба» ҳужумчиси Жоэл «Сан-Паулу» дарвозасига урган голини нишонлаш пайтида реклама шитидан сакраб ўтган ва пастга қулаганди. Ўшанда гол ҳисобга олинган, камерунлик футболчи эса ўйинни давом эттира олганди.
La Nacion портали қайд этишича, Жасини туннелдан чиқариб олган хавфсизлик хизмати ходими 12 йил олдин ҳам худди шу жойда турганди. У яна бир бор вирусдек айланаётган видео қаҳрамонига айланди.
