АҚШ медиаси 2 кундан бери Трамп ўтган ой Туркиядаги НАТО саммитидан ҳарбий самолётда яширинча қайтиб кетганини ёритаркан, президент буни тасдиқлади. Оҳайога жўнаши олдидан у журналистларга воқеа ҳақида қисқа сўзлаб, фақат махсус хизмат айтганидек қилганини билдирди. Таҳдид бор эди, дейди Трамп сўзини якунларкан.
Ўтган ой АҚШ президенти Туркияга НАТО саммити учун бориб, ортга қайтаётганида Америка махсус хизматлари президентга суиқасд режаларидан хабар топган. Тахминий ҳужум олдини олиш учун Трамп Анқарадан махсус операция орқали олиб кетилган. Айтилишича, Эрон Трампга суиқасд режалаган бўлиши мумкин эди.
Президент кўрсатилганидек хизмат самолётида бўлмаган. У самолётга чиққан ва нариги томондаги кейтеринг юк машинасига олиб ўтилиб, ҳарбий самолётга етказилган. Трамп ҳарбий самолёт билан Буюк Британиягача, сўнгра ўзининг хизмат самолётида Вашингтонга учиб кетган.
Бу махфий операция ҳақида The Washington Post газетаси ва унинг ортидан деярли барча катта медиалар ёзди. Ҳийла-найранг Эроннинг суиқасд таҳдиди сабаб ўйлаб топилган. Аммо энг нозик масала – президент бор деб кўрсатилган ва президент чиқмаган самолётда журналистлар ҳамда Оқ уй амалдорлари бўлган.
Режадан хабардор бўлган АҚШ расмийси сўзларига кўра, Эрон билан урушдан кейинги хавфсизлик хавотирлари сабабли президентнинг қаерда эканини сир сақлаш буюрилган ҳамда ҳарбий самолёт билан Туркиядан олиб чиқиб кетилган.
Шундай қилиб бир вақтнинг ўзида 3 та самолёт Британияга учган. Хавфсиз жиҳатидан камчиликлари борлиги сабаб Трамп чиқмаган Қатар совғаси бўлган борт, Трамп чиққандек қилиб кўрсатилган асосий хизмат самолёти ва махфий тарзда С-32 ҳарбий самолёти ҳам Британияга учган. Трамп ундан асосий хизмат самолётига ўтган ва Вашингтонга учиб кетган.
Шундан сўнг матбуотда нега Қатар совға қилган янги самолётда училмагани кенг муҳокамаларга сабаб бўлиб, саволларни кўпайтирди. Оқ уй ва президентнинг ўзи куздан бошлаб бу борт такомиллаштирилиши, бу эса 1-2 ойгина вақт олишини маълум қилди. Улар самолёт юқори хавфсизлик талабларига жавоб бермаслигини сабаб қилиб кўрсатишган.
Washington Post газетаси бу хабарни эълон қилгач, Оқ уй коммуникациялар департаменти буни рад этмади.
"Самолёт хавфсиз, ишончли ва президентлик миссияси талабларини қондириш учун зарур бўлган энг илғор технологиялар билан жиҳозланган", дейди ҳарбий-ҳаво кучлари Қатар совға қилган борт ҳақида.
Махфий хизматлар яширин операция борасидаги саволларга жавоб берганича йўқ. Сенаторлар ва Конгресс аъзолари воқеадан даҳшатга тушгани, Трампнинг эълон қилинмаган саёҳатлари даҳшатли эканини айтмоқда. Уларнинг фикрича, аслида нима бўлгани борасида оммага тушунтириш берилиши керак.
Вашингтонга учган рейсда журналистлар олдига чиққан Трампдан медиа нима учун самолёт ойналарини ёпишни талаб қилганини сўраган.
Сиз биз курашишимиз керак бўлган ифлос одамлар туфайли ҳам хавфли рейддасиз, деган президент. Унинг қўшимча қилишича, Эроннинг ўлдирилиши керак бўлганлар рўйхатида Трамп биринчи ўринда туради.
Аммо 11 август куни президент Оҳайо штатига жўнаши аввалидан журналистларга ростданам бу воқеа бўлганини, у махсус хизмат кўрсатмасига амал қилганини тасдиқлади.
Улар менинг бошқа рейсга, бошқа самолётга чиқишимни хоҳлашди. Хавфсизлик бир хил эди, лекин улар буни қилишимни хоҳлашди, шунинг учун мен буни қилдим. Қандайдир таҳдид бор эди, деди Трамп масалага қисқа тўхталиб. Лекин айнан Эрондан суиқасд режаси борлигини гапиришни хоҳламади.
