Қонунчиликка кўра, жисмоний шахс ўзи билан кредит битими тузилишини кредит бюросига ариза киритиш орқали тақиқлаш ҳуқуқига эга. Бу механизм, аввало, шахснинг хабарисиз ёки иштирокисиз унинг номига кредит расмийлаштирилишининг олдини олишга қаратилган.
Тақиқ ўрнатиш учун аризани Ягона интерактив давлат хизматлари портали (ЯИДХП) орқали электрон шаклда топшириш мумкин. Шунингдек, фуқаролар Давлат хизматлари маркази ёки кредит бюросига ёзма ёхуд электрон шаклда мурожаат қилиши мумкин.
Ариза қабул қилингач, кредит бюроси фуқарони дарҳол кредит битими тузиши тақиқланган шахслар реестрига киритади. ЯИДХП орқали берилган ариза кредит бюроларига автоматик равишда юборилади.
Шундан сўнг банк ёки бошқа тегишли кредит ташкилоти фуқаро билан кредит битими тузишдан олдин реестрда унга нисбатан тақиқ бор-йўқлигини текшириши керак. Қонунга кўра, реестрдан тегишли маълумот олинмасдан туриб кредит битимини тузиш тақиқланади.
Фуқаро истаган вақтда ушбу тақиқни олиб ташлаши ҳам мумкин. Тақиқни жорий қилиш ҳам, уни бекор қилиш ҳам ихтиёрий ва бепул амалга оширилади.
Хизмат натижаси бўйича QR-кодли маълумотнома тақдим этилади. ЯИДХП орқали мурожаат қилинганда у фуқаронинг шахсий кабинетига юборилади, Давлат хизматлари маркази орқали мурожаат қилинганда эса натижа белгиланган тартибда ариза берувчига етказилади.
Шу тариқа, фуқаро кредит олишни режалаштирмаётган даврда ўз номига кредит битими тузилишини олдиндан тақиқлаб қўйиши, зарурат туғилганда эса тақиқни бекор қилиши мумкин.
