KNDS Ammo Italy (илгари Simmel Difesa компаниясига тегишли бўлган) гуруҳи заводида ёнғин рўй берган. Corriere della Sera нашри ёзишича, цехлардан бирида компактор ёниб кетган – бу порохни пресслайдиган машина. Repubblica нашри қайд этишича, ҳолат маҳаллий вақт билан соат 14:45 да рўй берган.
Шундан кейин олов завод бўйлаб тарқалган ва якунда портлашга олиб келган, унинг овози қўшни қишлоқларда ҳам эшитилган.
Ўт ўчирувчилар ва полициячилар ёнғин бошланиши биланоқ, яъни портлашдан олдин у ерга етиб боришганди. Шу куни ишга чиққан 24 нафар ходимнинг барчаси хавфсизликда.
Атрофдаги йўллар хавфсизлик нуқтайи назаридан ёпилган.
«Вазият назорат остида, ҳеч ким ҳалок бўлмагани ва жабрланмагани тасдиқланишини кутяпмиз», – деган Коллеферро шаҳри мэри Жулио Каламита. Унинг сўзларига кўра, портлаш тўлқини завод яқинидаги бир нечта уйларнинг деразаларини синдириб юборган.
«Хайриятки, портлаш ишланмайдиган вақтда рўй берди, акс ҳолда фожиа бўлиши мумкин эди», – дея қўшимча қилди у. Италияда кўплаб компаниялар август ойида таътилга чиқади.
KNDS заводи ўрта ва йирик калибрли ўқ-дорилар ҳамда аэрокосмик саноат учун қаттиқ ёқилғи ишлаб чиқаради.
2007 йилда Коллеферродаги заводда (ўша пайтда у ҳали Simmel Difesa компаниясига тегишли эди) портлаш натижасида бир ишчи ҳалок бўлиб, яна 13 киши жароҳат олганди.
