Қора кийим кийган юзлаб ёшлар шаҳар марказида полиция ходимларига қўлбола ёнувчи воситалар, металл тўсиқлар ва шишалар улоқтирди. Кучишлатар тузилмалар намойишчиларни тарқатиш учун кўздан ёш оқизувчи газ ва сув пуркагичларни қўллади, бироқ чекинишга мажбур бўлди. Шундан сўнг намойишчилар Пяцца-дел-Дуомо марказий майдонини эгаллаб олди.
Тўқнашувлар оқибатида ўнлаб кишилар жароҳатланди, 60 киши қўлга олинди. Уларнинг ярмини вояга етмаганлар ташкил этади.
Турин, Болоня ва Бергамо шаҳарларида содир бўлган тартибсизликларда намойишчилар полиция ходимларига тошлар ва петардалар отди.
Бош вазир Жоржа Мелони тартибсизликларни қоралаб, намойиш ўтказиш ҳуқуқ эканини, аммо шаҳарларга ўт қўйиш мумкин эмаслигини таъкидлади.
«Бугун тинч намойишларда қатнашган минглаб кишиларга катта ҳурмат билан қарайман. Бироқ Италия шаҳарлари майдонларида содир бўлган воқеаларни эътиборсиз қолдириб бўлмайди. Миланда ушбу кадрларда кўриниб турганидек, ҳуқуқни муҳофаза қилувчи органлар ходимларига тошлар отилди; полиция ходимлари орасида жароҳатланганлар бор, тартибсизликлар ва зўравонликлар эса юришни тўхтатишга мажбур қилди. Туринда витриналарни синдириш учун ёнида тошлар ва болғалар олиб юрган шахслар қўлга олинди. Болоняда эса тартибсизликлар сабабли эҳтиёт чораси сифатида темирйўл вокзалини ёпишга тўғри келди», — деб ёзди у X ижтимоий тармоғида Миланнинг марказий майдонидаги намойишлар акс этган видеолавҳаларни жойлаштириб.
17 октябр куни Францияда оммавий намойишлар бўлиб ўтди – ёшлар яшаш нархи ошишига қарши ҳамда мактабларда ўқиш шароитларини яхшилаш ва олий ўқув юртларига киришнинг ҳозирги тизимини бекор қилиш учун кўчаларга чиқди. Акцияларда 500 мингдан 800 минггача аҳоли қатнашганлиги айтилмоқда.
Норозилик акциялари кенг кўламли тартибсизликлар ва талончиликлар билан бирга кечган. Полиция билан тўқнашувлар юзага келмоқда, намойишчиларга қарши кўздан ёш сиздирув газ ва сув пуркагичлар қўллаган. Бутун мамлакат бўйлаб мингдан ортиқ киши қўлга олинган.
