Қурувчилар хазинани канализация қувурлари учун йўл очаётганда, уй остидаги ертўла деворида учратишган.
«Мен аввалига уларни 1 евролик тангалар деб ўйладим. Лекин кейин ёнида бир ёмби олтинни кўриб қолдим. Ва шунда биз каттароқ нарсани топганимизни билдик», – дейди бригада аъзоси, 18 ёшли талаба Кобе Белгиянинг VRT телерадиокомпаниясига.
Қурувчилар хазинани ўзларида олиб қолиш ҳақида ўйлашмаган ва дарҳол полицияни чақиришган.
«У ерда жуда кўп танга ва ёмбилар бор эди – бунинг имкони йўқ эди, – дейди VRT телеканалига бригадир Марио. – Ҳа, бу шунчаки ўғрилик бўлган бўларди».
«Тўққиз миллион евро – бунча нарсани яшириб бўлмайди», – дея унинг фикрига қўшилади Кобе.
Полиция томонидан эълон қилинган фотосуратларда кўриш мумкинки, барча олтин қуймалар маркировка қилинган, аммо улар ва тангалар қайси даврга мансублигига аниқлик киритилмаган. Улар қачон ва қандай қилиб девор ичига солиб қўйилгани ҳақида ҳам маълумот йўқ.
Маҳаллий нашрлар хабар беришича, хазина топилган Белгия шимолидаги Дендермонде туманида жойлашган уй XIX аср охиридан бери пиво ишлаб чиқарувчи тадбиркорга тегишли бўлган, ҳозир эса ишчилар уни Дендермондеда ижтимоий ёрдам билан шуғулланувчи CAW Oost-Vlaanderen ташкилоти (ташкилот бинони сотиб олган) эҳтиёжлари учун тўлиқ қайта қурмоқда.
CAW Oost-Vlaanderen директори Герт Ҳиллерт журналистларга бу ҳайратланарли топилмадан жуда хурсанд экани ва бу бойлик унинг хайрия ташкилотига берилиши ва одамлар учун ишлатилишига умид қилишини айтган.
Аммо Белгия нашрлари ёзишича, бу осон бўлмайди.
Биринчидан, журналистларнинг ёзишича, хазинани уни топган ишчилар ва уйга эгалик қилувчи ташкилот ўртасида бўлишиш керак.
Иккинчидан, Белгия қонунларига кўра, хазинанинг қонуний эгаси пайдо бўлиши учун беш йил кутилади.
Учинчидан, агар яширилган хазина жиноий йўл билан қўлга киритилгани маълум бўлса, хазина бу томонларнинг ҳеч бирига насиб этмайди.
Маҳаллий полиция тергов ишларини бошлаган, одамлардан «олтин чиққан» уйга бормаслик сўралган, у ер аллақачон ағдар-тўнтар қилингани ва хазина ишончли жойга кўчирилгани маълум қилинган.
Шу билан бирга, полициячилар хазина учун «тўғри жой топилиши»га ва у одамлар ҳаётини яхши томонга ўзгартиришга ёрдам беришига умид билдиришган.
