2026 йилда дунёнинг бозор капитализацияси энг юқори бўлган авиакомпаниялари маълум бўлди. Рейтинг CompaniesMarketCapʼнинг июль ойидаги маълумотлари асосида тузилган бўлиб, унга фақат акциялари биржада сотиладиган оммавий компаниялар киритилган. Хусусий ва тўлиқ давлатга қарашли авиакомпаниялар ҳисобга олинмаган.

Рейтингда биринчи ўринни АҚШнинг Delta Air Lines авиакомпанияси эгаллади. Июл ойида унинг бозор капитализацияси 58,5 млрд долларни ташкил этган. Бу иккинчи ўриндаги энг яқин рақобатчисидан 18 млрд доллардан кўпроққа юқори.

Delta 1925 йилда ташкил этилган бўлиб, бош қароргоҳи Атланта шаҳрида жойлашган. Компания кунига 5,4 мингдан ортиқ рейсни амалга оширади ва SkyTeam халқаро авиалянсининг асосчиларидан бири ҳисобланади.

Иккинчи ўринни яна бир АҚШ авиакомпанияси — United Airlines эгаллаган. Унинг бозор капитализацияси 40,1 млрд долларга баҳоланган.

АҚШнинг йирик авиакомпаниялари ўртасида бозор қиймати бўйича сезиларли фарқ мавжуд. Масалан, American Airlines капитализацияси 10,1 млрд долларни ташкил этган — бу Delta қийматининг бешдан бир қисмидан ҳам кам.

Манбада бу фарқ American Airlinesʼнинг рақобатчиларига нисбатан пастроқ рентабеллиги ва юқорироқ қарз юки билан изоҳланган.

Шу билан бирга, асосан Шимолий Америка ҳудудида парвозларни амалга оширадиган Southwest Airlines 22,3 млрд долларлик бозор қиймати билан American Airlinesʼдан икки баробардан ҳам қиммат баҳоланган.

Ryanair Европада етакчи

Рейтингнинг учинчи поғонасини Ирландиянинг Ryanair лоукостери эгаллади. Компаниянинг бозор капитализацияси 31,1 млрд долларни ташкил этган. Шу тариқа, Ryanair АҚШдан ташқаридаги энг қиммат авиакомпания бўлган.

Дублинда жойлашган Ryanair йўловчилар сони ва амалга ошириладиган рейслар миқдори бўйича Европанинг йирик ташувчиларидан ҳисобланади. Компания бизнес модели нисбатан арзон базавий чипталарга асосланган, багаж ташиш, ўрин танлаш ва бошқа қўшимча хизматлар учун эса алоҳида ҳақ олинади.

Ryanair бозор капитализацияси бўйича IAG ва Lufthansa каби йирик Европа авиация гуруҳларини ҳам ортда қолдирган.

Осиё авиакомпаниялари кучли йигирматаликнинг ярмини эгаллади