Иқтисодий ҳамкорлик ва тараққиёт ташкилоти (OECD) ўтказадиган PISA халқаро тадқиқотининг 2022 йилги натижаларида Сингапур математика бўйича энг юқори натижани кўрсатган.
Сингапурлик 15 ёшли ўқувчилар математика саводхонлиги бўйича ўртача 575 балл тўплаган. Бу OECD давлатларининг ўртача натижасидан 100 баллдан зиёд юқори.
Қайд этилишича, Сингапурнинг кўрсаткичи 2018 йилга нисбатан 6 баллга ошган. Айни пайтда OECD мамлакатларининг математика бўйича ўртача натижаси 2022 йилда 472 баллни ташкил этган. Бу 2018 йилги кўрсаткичдан 15 баллга паст.
Рейтингда иккинчи ўринни Хитойнинг махсус маъмурий ҳудуди Макао 552 балл билан эгаллаган. Учинчи ўринда 547 балл тўплаган Тайван жойлашган.
Кучли бешликдан Ҳонгконг — 540 балл ва Япония — 536 балл билан ўрин олган.
Европа давлатлари орасида энг юқори натижани Эстония кўрсатган — 510 балл. Шунингдек, Швейцария ва Нидерландия ҳам математика саводхонлиги бўйича кучли ўнталикка кирган.
Инфографикага 425 баллдан кам натижа кўрсатган давлат ва ҳудудлар киритилмаган. Улар орасида Қатар, Мексика, Индонезия ва Марокаш ҳам бор.
PISA тадқиқотида иштирок этган 81 давлат ва ҳудуд орасида математика бўйича энг паст натижалар Камбоджа, Парагвай ва Доминикан Республикасида қайд этилган. Уларнинг ҳар бири 340 баллдан кам натижа кўрсатган.
Шу билан бирга, 2022 йилги PISA тадқиқотида материк Хитой натижалари ҳисобга олинмаган. Хитой 2018 йилги тадқиқотда етакчи бўлган.
Россия ҳам 2022 йилги тест синовларида иштирок этмаган. 2018 йилда россиялик ўқувчилар математика саводхонлиги бўйича ўртача 488 балл тўплаган.
