Бу президент томонидан 17 август куни имзоланган ЎРҚ–1168-сон қонунда белгиланди. Ҳужжат билан тадбиркорлик фаолияти эркинлигининг кафолатларига оид қонунчиликка қатор ўзгартириш ва қўшимчалар киритилган.
Қонунга мувофиқ, назорат қилувчи органлар тадбиркорлик субъектларида текширув ўтказишда «Хавфни таҳлил қилиш» электрон тизимидан фойдаланади. Ушбу тизим натижалари асосида тадбиркорлар фаолияти хавф даражасига қараб паст, ўрта ва юқори тоифаларга ажратилади.
Бунда назорат қилувчи органлар текширув ўтказиш ваколатига эга мансабдор шахслар, текшириладиган соҳалар ва текширувларни ўтказиш учун рухсат бериладиган махсус гувоҳномага эга ходимлар ҳақидаги маълумотларни махсус реестрларга киритиши назарда тутилган.
Шунингдек, тадбиркорлик субъекти фаолиятида қонунбузилиш содир этилиши хавфи даражасидан келиб чиқиб, назорат чоралари белгиланади. Қонунда назарда тутилган ҳолларда текширув Бизнес-омбудсман хабардор қилинганидан сўнг ўтказилади.
Назорат қилувчи органлар томонидан тадбиркорларга нисбатан молиявий санкция қўллаш тартиби ҳам аниқлаштирилган. Хусусан, молиявий санкция қўллаш тўғрисидаги қарорни тадбиркор ихтиёрий равишда бажариш учун унга қарор қабул қилинган кундан бошлаб 10 кунлик муддат берилади.
Агар тадбиркор молиявий санкция суммасининг 50 фоизини 10 кун ичида ихтиёрий равишда тўласа, қолган қисмини тўлашдан озод этилади. Мазкур тартиб тадбиркор молиявий санкция қўллаш ҳақидаги қарор устидан шикоят қилмаган тақдирда амал қилади.
Қонун расмий эълон қилинган кундан эътиборан уч ой ўтгач кучга киради.
