Қурилиш вазирлиги Kun.uz томонидан эълон қилинган «Қурилишдаги самарасиз назорат: Newport мисолида тизимли муаммога назар» мақоласига муносабат билдирди.
Мақолада қурилиш соҳасидаги назорат, ноқонуний объектлар, масъулларнинг жавобгарлиги ҳамда бундай уйлардан хонадон сотиб олган фуқаролар ҳуқуқлари муҳокама қилинган, шунингдек, Newport мажмуаси мисолида қурилишга масъул давлат органлари томонидан етарли назорат ўрнатилмагани ҳақида фикрлар билдирилган эди.
Вазирлик томонидан эълон қилинган баёнотда айтилишича, Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекцияси томоидан бир муддат аввал эълон қилинган маълумотлар объектдаги қоидабузарликлар назоратсиз қолдирилмаганини кўрсатади.
«Яккасарой туманида “MEGA LOGISTICS SERVICE” МЧЖ томонидан қурилаётган Newport мажмуаси жами 9 та блокдан иборат. Уларнинг 3 таси бўйича Архитектура ва шаҳарсозлик кенгаши ишчи органининг ижобий хулосаси ҳамда тегишли экспертиза хулосалари мавжуд. Ушбу блокларда қурилиш-монтаж ишларини бошлаш Тошкент шаҳар ҳудудий назорат инспекциясида белгиланган тартибда рўйхатдан ўтказилган.
Қолган 6 та блокда эса қурилиш-монтаж ишлари Инспекциядан белгиланган тартибда рўйхатдан ўтказилмасдан олиб борилаётгани назорат тадбирлари давомида аниқланган.
Аниқланган қоидабузарликлар юзасидан буюртмачи — “MEGA LOGISTICS SERVICE” МЧЖга бир неча марта бажарилиши мажбурий бўлган ёзма кўрсатмалар берилган. Компаниядан қурилишни тасдиқланган шаҳарсозлик ҳужжатлари асосида давом эттириш ва объектларни Инспекциядан тегишли тартибда рўйхатдан ўтказиш талаб қилинган.
Бироқ кўрсатмаларда белгиланган талаблар бажарилмаган. Натижада компаниянинг масъул мансабдор шахслари маъмурий жавобгарликка тортилган. Шунингдек, буюртмачининг техник назоратчисига нисбатан тақдимнома киритилиб, тегишли таъсир чоралари қўлланган», дейилади баёнотда.
Таъкидланишича, шу билан чоралар чекланиб қолмаган.
«Инспекция тўплаган ҳужжатлар қоидабузарликларга ҳуқуқий баҳо бериш ва қонунчиликда белгиланган чораларни кўриш учун ҳуқуқни муҳофаза қилувчи органларга юборилган. Айнан мана шу босқичда жамоатчиликка мазкур хабарлар эълон қилинган ва унинг ортидан турли мулоҳазалар пайдо бўлган. Шу нуқтаи назардан, Newport мажмуасидаги қурилишлар назорат органлари томонидан умуман эътиборсиз қолдирилган, деган хулоса ҳолатнинг барча жиҳатларини тўлиқ акс эттирмайди. Объектдаги қоидабузарликлар аниқланган, буюртмачига мажбурий кўрсатмалар берилган, масъул шахслар жавобгарликка тортилган ва материаллар ҳуқуқни муҳофаза қилувчи органларга тақдим этилган», дейилади баёнотда.
