Ҳукуматнинг 2026 йил 20 августдаги 451-сон қарори билан «Касбий таълим ташкилотлари директорлари ва директор ўринбосарларини менежерлик ўқув курсларида ўқитиш ва уларга менежерлик сертификатини бериш тартиби тўғрисида»ги низом тасдиқланди.
Низомга мувофиқ, техникумларда фаолият юритаётган директорлар ва директор ўринбосарлари белгиланган тартибда менежерлик сертификатини олади.
Бунинг учун директорлар ва уларнинг ўринбосарлари махсус портал орқали рўйхатдан ўтиб, менежерлик ўқув курсида қатнашиш учун электрон ариза топширади.
Ўқув курсини муваффақиятли якунлаган тингловчилар якуний синовдан ўтади. Синовда ижобий натижа қайд этган тингловчига натижалар эълон қилинган кундан бошлаб бир ҳафта ичида ўқув ташкилоти раҳбарининг буйруғи асосида давлат намунасидаги менежерлик сертификати берилади.
Сертификат электрон шаклда расмийлаштирилади. У электрон рақамли имзо билан тасдиқланади ва унга QR-код жойлаштирилади.
Шу билан бирга, илмий даража ёки илмий унвонга эга бўлган директорлар ва директор ўринбосарлари учун алоҳида тартиб белгиланган. Уларга менежерлик сертификати ўз аризаси асосида тўғридан тўғри 3 йил муддатга берилади.
Янги тартиб касбий таълим ташкилотларида раҳбарлик қилаётган кадрларнинг бошқарув кўникмаларини тизимли равишда ривожлантириш ва уларнинг менежерлик малакасини сертификатлашни назарда тутади.
