Россия шахмат федерацияси (РШФ) Россиянинг эркаклар ва аёллар терма жамоалари 15 сентябрда Самарқандда очиладиган Бутунжаҳон шахмат олимпиадасида иштирок этмаслигини маълум қилди. Уларнинг мусобақада ўйнашига рухсат бермаслик ҳақидаги қарорни 23 август куни бўлиб ўтган йиғилишида «Россия масаласи»ни кўриб чиққан Халқаро шахмат федерацияси (FIDE) кенгаши — ташкилотнинг олий ижро органи қабул қилди.
Бу Ченнай–2022 (Хитой) ва Будапешт–2024 (Венгрия) олимпиадаларидан кейин Россиясиз ўтадиган кетма-кет учинчи турнир.
2025 йил январь ойида FIDE кенгаши Россия ва Беларуснинг болалар-ўсмирлар ва паралимпия жамоаларини расмий мусобақаларга қўйишга рухсат берган, ўша йилнинг июнида эса Россия аёллар терма жамоасининг жамоавий жаҳон чемпионатида иштирок этишини маъқуллаган эди – якунда терма жамоа бу мусобақада ғолиб бўлди. Яъни, вазият санкцияларни юмшатиш томонга кетаётган эди.
Бироқ 2026 йил 10 июнь куни FIDE Спорт арбитраж суди (CAS) қарорини бажармагани учун Россия шахмат федерациясининг (РШФ) аъзолигини вақтинча тўхтатиб қўйди. CAS қарорига кўра, РШФ Украинанинг босиб олинган Қрим, Севастопол, ДХР, ЛХР, Херсон ва Запорожие вилоятларида шахмат фаолиятини бошқаришни ҳамда тадбирлар ўтказишни тўхтатиши керак эди.
2026 йил 23–24 август кунлари FIDE Президент кенгаши россиялик гроссмейстерларни Бутунжаҳон олимпиадасига қўймаслик ҳақида қарор қабул қилди, деб хабар берди РШФ ижрочи директори Александр Ткачёв. Унинг сўзларига кўра, кенгаш аъзоларининг аксарияти Россия терма жамоасининг иштирокига қарши чиққан. Ткачёв бу ташаббус FIDE президенти вазифасини бажарувчи Вишванатан Ананддан чиққанини таъкидлади.
Аввалроқ FIDE президенти ваколатларини бажаришни тўхтатган россиялик Аркадий Дворкович июль ойида Европа Иттифоқи унга қарши санкциялар жорий қилганидан сўнг ўзини четга олган эди. Ҳозир президент вазифасини Вишванатан Ананд бажаряпти.
