Figure AI компанияси ғайриоддий усулда F.02 одамсимон роботлар паркини йўқ қилди. Машиналар мустақил равишда Финландиянинг Иматра шаҳридаги қуюв заводида жойлашган 75 тонналик электр ёй печига сакради, шундан сўнг улар эриган металлга айланди, деб ёзди Interesting Engineering.
Компания янги авлод F.03 роботларига ўтганидан сўнг, эскиларини утилизация қилиш зарурати туғилди. Эски машиналарни ишчи ҳолатда сақлаш мақсадга мувофиқ эмас эди, оддийгина қисмларга ажратиш эса фирма аппарат ечимларини ошкор қилиши ва кейинги F.04 модели устида ишлаши керак бўлган муҳандисларнинг вақтини олиши мумкин эди.
Figure AI роботларни уларнинг ички қисмларини очмасдан йўқ қилиш йўлини топишга мажбур бўлди. АҚШ ва Мексикадаги бир нечта заводлар машиналарга ўрнатилган литий-ионли аккумуляторлар туфайли уларни қабул қилишдан бош тортди. Натижада компания Финландия корхонаси билан келишувга эришди.
Ечим излаш жараёнида Figure AI «Афсоналарни емирувчилар» шоусининг собиқ иштирокчиларидан ҳам ёрдам сўради. Роботларни печга ташлаш ғоясини кейинчалик лойиҳага қўшилган актёр Арнолд Шварценеггер қўллаб-қувватлади. Айнан унинг иштирокида суратга олинган «Терминатор» фильмидаги робот якунда металл эритиш печига тушиб, ўзини ўзи йўқ қилган.
Финландияга жўнатишдан олдин муҳандислар F.02 роботини керакли нуқтага сакрашга ўргатишди. Бунинг учун Сан-Хоседаги Figure штаб-квартирасида катта хавфсизлик ёстиқчалари ўрнатилди ва роботлар иккинчи қаватдан тушишга машқ қилдирилди.
Роботлар эритилгандан сўнг, қуйма металл шаклида АҚШга қайтарилди. Figure AI компаниясининг таъкидлашича, видеодаги воқеалар компьютер графикаси эмас: роботлар ҳақиқатан ҳам ёниб турган печга сакраган.
