Ўзбекистон бўйлаб 28 июлдан 6 сентябрга қадар «Долзарб 40 кунлик» тозалик тадбирлари ўтказилди. Бу ҳақда Чиқиндиларни бошқариш агентлиги хабар берди.
Тадбирлар доирасида санитар тозалаш ва ободонлаштириш хизматларининг тун-у кун навбатчилиги ташкил этилди. Ҳудудлардан чиқиндиларни олиб чиқиш ишларига ҳар куни ўртача 4,5 мингта махсус техника ва 10 мингдан ортиқ соҳа ходими жалб қилинди.
Агентлик маълумотига кўра, республика бўйича бир кунда ўртача 30–40 минг тонна чиқинди олиб чиқилди. 40 кун давомида жами 1 млн 400 минг тонна қаттиқ маиший ва 2 минг тонна қурилиш чиқиндиси олиб чиқилиб, утилизация қилинган.
Шунингдек, республикадаги 8 150 та маҳалланинг 7 674 таси тозалик тадбирлари билан тўлиқ қамраб олинди.
Тадбирлар давомида чиқиндиларни белгиланмаган жойларга ташлаш билан боғлиқ 97 та ҳуқуқбузарлик ҳолати аниқланган. Қоидабузарларга жами 165,4 млн сўм миқдорида маъмурий жарима қўлланган.
Фуқаролардан тозалик ва чиқиндилар билан боғлиқ 327 та мурожаат келиб тушган. Уларнинг 275 таси жойида ҳал этилган, яна 52 таси ўрганиш жараёнида.
Бундан ташқари, Чиқинди полигонларини бошқариш дирекцияси томонидан ҳам «Долзарб 40 кунлик» тадбирлари амалга оширилди.
Маълум қилинишича, республика бўйича умумий майдони 1 653 гектар бўлган 135 та қаттиқ маиший чиқинди полигонида ҳар куни ўртача 4,5–4,7 мингта қатнов амалга оширилган. Полигонларга бир кунда 14–15 минг тонна чиқинди қабул қилиниб, жойлаштирилган.
