Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.
Киевда отишма
2 сентябр куни Киевда Украина Хавфсизлик хизмати (СБУ) ва Мудофаа вазирлиги Бош разведка бошқармасининг (ГУР) «айрим бўлинмалари ўртасида» отишма бўлиб ўтди. Бу маълумотни президент Володимир Зеленский тасдиқлади ва юз берган воқеани «мутлақо шармандали ҳолат» деб атади.
«Бош прокурор ва Давлат тергов бюроси барча тафсилотларни аниқлайди: ушбу воқеа иштирокчиларининг барча кўрсатмалари ва баёнотлари, бутун вазият қадамма-қадам текширилади», деди Зеленский.
Украина президенти айбдорларни жавобгарликка тортишга, жумладан, «кадрлар бўйича қарорлар» қабул қилишга ва «ҳар иккала хизматда ҳам ички текширувлар» ўтказишга ваъда берди. Шунингдек, тез орада Хавфсизлик хизматининг «Давлат сирини сақлаш ва лицензиялаш департаменти» бошлиғи Олег Храмов ишдан бўшатилди.
2 сентябр тонгида Киевнинг Днепровский туманида СБУ ва ГУР ходимлари ўртасида отишма содир бўлгани ҳақида маълумотлар тарқалди. Хавфсизлик хизмати вакиллари ўз тезкор ходимларига тинтувлар вақтида қуролли ҳужум қилингани ҳақида маълум қилди. Натижада «қаршилик кўрсатган баъзи шахслар» яраланган, ҳужум қилганлар эса қўлга олинган, дея таъкидлади СБУ. Шунингдек, идора қўлга олинганлар Украина армияси «бўлинмаларидан бирига» тегишли эканини айтган.
Тасдиқланмаган маълумотларга кўра, гап — Украина армиясининг «Россия кўнгиллилар корпуси» бўлинмаси қўмондони Степан Каплунов ҳақида кетмоқда. Хавфсизлик хизмати унга «суиқасд қилиниши» эҳтимоли юзасидан Каплуновни олиб кетган. Ҳарбийлар эса хавфсизлик ходимларига қаршилик қилган.
Каплуновни қўлга олиш чоғида Хавфсизлик хизмати махсус кучлари ва ҳарбий разведка ходимлари ўртасида отишма чиққани айтилмоқда. ГУРнинг бир нафар ходими вафот этган бўлиши мумкин.
Каплуновнинг адвокати сўзларига кўра, унинг мижози 2 сентябр куни кундузи «аллақачон озодликка чиққан» бўлган. Ҳуқуқшунос СБУнинг «суиқасднинг олди олингани ҳақидаги версияси уйдирма» бўлиши мумкин деб ҳисобламоқда.
АҚШ ҳарбий кемаси Паттаяга келди
Яқин Шарқдаги узоқ муддатли хизматдан сўнг АҚШ Ҳарбий-денгиз кучларининг авиаташувчи кемаси Таиланднинг Паттая курорти шаҳрига кирмоқда.
