"Бизнинг мақсадимиз – Ўзбекистонда етакчи замонавий хусусий банклардан бирини барпо этиш" – ABB бошқарув раиси банкнинг Ўзбекистон бозорига кириб келиши ҳақида — Kun.uz
"Бизнинг мақсадимиз – Ўзбекистонда етакчи замонавий хусусий банклардан бирини барпо этиш" – ABB бошқарув раиси банкнинг Ўзбекистон бозорига кириб келиши ҳақида
|15:301 0289 мин
Реклама
ABB’нинг Ўзбекистон бозорига кириши ушбу Озарбайжон молия гуруҳининг халқаро стратегиясида муҳим босқич ҳисобланади. Ҳуқуқий жараёнлар якунлангач, “Davr Bank” “ABB Davr” брендига ўтишни бошлайди; ушбу бренд фаолиятини жорий йилнинг октябр ойидаёқ йўлга қўйиш режалаштирилган. ABB Бошқарув раиси Аббос Иброҳимов янги банкнинг дастлабки қадамлари, рақамлаштириш ва сунъий интеллект соҳасидаги устувор йўналишлар, кичик ва ўрта бизнесни қўллаб-қувватлаш режалари ҳамда Ўзбекистоннинг етакчи хусусий банкларидан бирини барпо этишга қаратилган мақсадлар ҳақида сўз юритди.
— 23 август куни Озарбайжон ва Ўзбекистон президентлари иштирокида ABB Davr лойиҳасига расман старт берилди. Ҳозир кўпчиликни асосий савол қизиқтиради: банк ABB Davr бренди остида қачон ишлай бошлайди?
— Ҳа, 23 август биз учун тарихий кунга айланди. Озарбайжон Республикаси президенти жаноб Илҳом Алиев ва Ўзбекистон Республикаси президенти жаноб Шавкат Мирзиёев иштирокида ABB Davr лойиҳасига расман старт берилди. Озарбайжон президенти бу воқеани етакчи Озарбайжон банкининг Ўзбекистон бозорига чиқиши сифатида таърифлади. Бизнинг учун бу бир вақтнинг ўзида катта ғурур ва катта масъулиятдир.
Биз ушбу лойиҳага юқори даражада кўрсатилган қўллаб-қувватлаш учун Озарбайжон ва Ўзбекистон президентларига миннатдорчилик билдирамиз. Шунингдек, лойиҳани амалга оширишнинг барча босқичларида бизга кўмаклашган икки мамлакат давлат тузилмаларига — марказий банкларга, Озарбайжон Республикаси Иқтисодиёт вазирлигига, Ўзбекистон Республикаси Инвестициялар, саноат ва савдо вазирлигига, шунингдек, Ўзбекистон Республикаси Рақобатни ривожлантириш ва истеъмолчилар ҳуқуқларини ҳимоя қилиш қўмитасига миннатдорчилик билдиришни истардик.
Лойиҳанинг расмий стартидан олдин барча зарур рухсатномалар олинди ва акцияларни сотиб олиш-сотиш шартномаси аллақачон имзоланди. Кейинги босқичда қонунчилик ва шартномада назарда тутилган тартиб-таомилларга мувофиқ акцияларга бўлган ҳуқуқларнинг юридик ўтказилиши амалга оширилади ва акциядорлар реестрига тегишли ўзгартиришлар киритилади. Ушбу жараён якунлангандан сўнг ABB Davr Банкнинг асосий акциядорига айланади. Биз бу жараён яқин 7–10 кун ичида якунланишини кутмоқдамиз.
ABB Davr бренди остида иш банкнинг номи ўзгариши билан боғлиқ расмий тартиб-таомиллар якунлангандан сўнг дарҳол бошланади. Менимча, тахминан октябр ойида ABB Davr брендини кўрамиз.
— Ребренгдинг қандай тартибда ўтказилади?
— Биринчи навбатда биз корпоратив коммуникациялар ва рақамли каналлардан бошлаймиз. Филиаллар, банкоматлар, карталар ва мижозлар билан алоқанинг бошқа жисмоний нуқталарининг ABB Davr брендига ўтиши босқичма-босқич амалга оширилади. Айнан шундай ёндашув бизнинг ўтиш режамизда ҳам назарда тутилган.
Мавзуга оид
Бизнинг вазифамиз — шунчаки номи ва ёрлиғини алмаштириш эмас, балки ABB бренди ортида турган хизмат сифати, технологиялар, инновациялар ва институционал тажрибани Ўзбекистонга олиб киришдир.
— Асосий устуворликларингиз қандай?
— Биринчи босқичда бизнинг мақсадимиз — Davr Bank'нинг мавжуд кучли томонларини сақлаб қолиш ва шу билан бирга кейинги ривожланиш учун мустаҳкам асос яратишдир. Кейин биз ABB Davr'га корпоратив бошқарув, рақамлаштириш, сунъий интеллект, хавф-хатарларни (рискларни) бошқариш ва мижозлар тажрибаси соҳасидаги ABB тажрибасини босқичма-босқич жорий қиламиз.
Биз қисқа муддатда натижа бера оладиган ташаббусларга алоҳида эътибор қаратамиз. Озарбайжонда самарадорлигини исботлаган баъзи рақамли ва сунъий интеллектга асосланган ечимлар маҳаллий бозор хусусиятларига тезда мослаштирилиб, ABB Davr'га жорий этилиши мумкин.
— Нима учун Ўзбекистон бозорига чиқиш учун айнан Davr Bank'ни танладингиз?
— Биз ундан каттароқ қиймат яратишимиз мумкин бўлган банк, платформани изладик. Қидирув жараёнида биз Davr Bank'нинг тарихини, фаолиятини, маҳсулот ва хизматларини, ҳамкорлик муносабатлари ва халкаро алоқаларини диққат билан ўргандик. Биз банк кўплаб параметрлар бўйича бизнинг мезонларимизга мос келиши ҳақида хулосага келдик — бунга ривожланиш динамикаси, халқаро алоқалар, хизмат кўрсатиш тармоғи, мижозлар сегментлари, барқарор ва юқори ўсиш суръатлари киради.
Бугунги кунда Davr Bank'нинг 2 миллион нафардан ортиқ мижози, 1 800 дан ортиқ ходими, пойтахт ва вилоятларда 43 та филиал ва хизмат кўрсатиш маркази мавжуд. Активлар ҳажми 2 миллиард манатдан ошади. Банк кичик ва ўрта бизнесни молиялаштиришда фаол ўрин эгаллайди.
Биз учун нафақат рақамлар, балки ҳамкорлик ёндашуви ҳам муҳим эди. Davr Bank'да биз яхши базани ҳам, бизнес-моделни ҳам, кучли жамоани ҳам, биз билан бир йўналишда қарайётган ва бизнинг қарашларимизни баҳам кўрадиган ҳамкорни ҳам кўрдик. Бизнинг банкнинг келажаги ва кейинги ривожланиш йўналишларига бўлган қарашларимиз амалдаги акциядорлар ва банк жамоаси билан кўп жиҳатдан мос келди.
Биз маҳаллий бозорни билиш, жамоа ва Davr Bank'нинг мавжуд кучли томонларини ABB капитали, технологиялари ва институционал тажрибаси билан бирлаштирмоқчимиз.
— ABB Davr қандай банк бўлади?
— Бизнинг мақсадларимиз аниқ. Биз Ўзбекистоннинг етакчи хусусий банкларидан бирига айланмоқчимиз — кучли, замонавий ва барқарор молия институтига.
ABB Davr жисмоний шахсларга, шунингдек кичик ва ўрта бизнес ҳамда корпоратив мижозларга хизмат кўрсатувчи универсал банк бўлади. Биз айниқса кичик ва ўрта бизнес билан ишлаш, рақамли банкинг, тўловлар, ҳужжатли операциялар ва корпоратив молиялаштириш каби йўналишларда катта салоҳиятни кўрмоқдамиз.
Шу билан бирга биз вақт ўтиши билан Озарбайжонда муваффақиятли шакллантирган Beyond Banking соҳасидаги тажрибамизни ҳам Ўзбекистон бозорига мослаштирмоқчимиз.
Шу ерда жуда муҳим жиҳатни таъкидлаб ўтмоқчиман. Биз ABB моделини Озарбайжонда ўзгаришсиз ҳолда Ўзбекистон бозорига оддийгина кўчиришни мўлжалламаяпмиз. Банк бизнеси кўп жиҳатдан маҳаллий хусусиятга эга. Ўзбекистон бозори — катта, динамик ва ўзига хос хусусиятларга эга бозор. Буни ҳисобга олган ҳолда, биз маҳсулот ва хизматларимизни маҳаллий мижозларнинг эҳтиёжлари ва хатти-ҳаракатларига, шунингдек бозор хусусиятларига мослаштирамиз.
Айнан шунинг учун биз учун ўзбек мижозларининг эҳтиёжлари, бозор хусусиятлари, маҳаллий жамоанинг билим ва тажрибаси тамойил жиҳатидан муҳимдир. Биз ABB технологиялари ва тажрибасини ушбу маҳаллий билим ва компетенциялар билан бирлаштирамиз.
— ABB Davr Озарбайжон ва Ўзбекистон ўртасидаги иқтисодий алоқаларни ривожлантиришга қандай ҳисса қўша олади?
— Ўзбекистонда Озарбайжон капитали иштирокидаги 470 дан ортиқ корхона, Озарбайжонда эса ўзбек капитали иштирокидаги 130 дан ортиқ корхона рўйхатга олинган. Ушбу рақамларнинг ўзи икки мамлакат ўртасида жиддий бизнес-экотизим шаклланганини кўрсатади. Ўзаро савдо ва инвестициялар ўсиши билан ушбу компанияларнинг молиявий хизматларга бўлган эҳтиёжи ҳам ортиб бормоқда.
ABB Davr ушбу экотизим учун молиявий кўприкка айланиши мумкин. Ҳисоб-китоблар, савдо молиялаштириши, ҳужжатли операциялар, шунингдек, янги бизнес ва инвестиция лойиҳаларини молиялаштириш бу борада қўшимча имкониятлар очади.
Шу билан бирга, ABB Davr биринчи навбатда Ўзбекистон бозори ва ўзбек мижозлари учун ишлайдиган маҳаллий банк бўлади. Биз мамлакат иқтисодий ривожланишига, тадбиркорликни қўллаб-қувватлашга ва айниқса кичик ва ўрта бизнеснинг ривожланишига реал ҳисса қўшишни мақсад қилганмиз.
— Ушбу лойиҳанинг ABB учун стратегик аҳамияти қандай?
— Бу ABBнинг 2026–2028 йилларга мўлжалланган ривожланиш стратегиясида назарда тутилган географик экспансия мақсадига эришишнинг биринчи катта қадамидир. Биз учун айниқса муҳими, биз бу йўлни айнан қардош Ўзбекистондан бошлаяпмиз.
ABB Молия гуруҳи сифатида биз энди тахминан 5,5 миллион мижозга хизмат кўрсатамиз, мурожаат қила оладиган потенциал аудиториямиз эса тахминан 10 миллиондан 50 миллион кишигача ошади.
Аммо мен бу лойиҳанинг аҳамиятини фақат рақамлар билан ўлчамаган бўлардим. Биз Ўзбекистонга нафақат капитал олиб кирмоқдамиз. Биз шунингдек сўнгги йилларда Озарбайжонда шакллантирган билим, тажриба ва ечимларни ҳам экспорт қилмоқдамиз. Бизда рақамли ечимларимиз, сунъий интеллект моделларимиз, рискларни бошқариш ва корпоратив бошқарувга ёндашувларимиз, шунингдек анъанавий банкинг чегарасидан ташқарида биз яратган хизматлар имкониятларини анча каттароқ миқёсда қўллаш имконияти пайдо бўлмоқда.
Яна бир стратегик устунлик — масштаб эффекти. Каттароқ мижозлар базаси бизга технологиялар ва сунъий интеллектга кўпроқ инвестиция қилиш имконини беради. Эртага яратадиган ҳар қандай рақамли ечим ёки сунъий интеллект модели фақат Озарбайжонга қараганда анча кенгроқ географияда миллионлаб мижозларга фойда келтира олади.
Бу ерда яна бир жуда муҳим жиҳат бор. Ушбу лойиҳа нафақат Davr Bank'ни, балки ABB'нинг ўзини ҳам ўзгартиради. Биз биринчи марта Озарбайжонда яратган банк моделимизни кенгроқ географияда қўллаймиз, янги компетенцияларга эга бўламиз ва минтақавий молия гуруҳи сифатида ишлашни ўрганамиз.
Шу маънода ABB Davr лойиҳаси — бу Озарбайжон молиявий бренди, технологиялари ва банк тажрибасининг янги хорижий бозорга чиқишидир.
