2025 йил апрел ойида Тошкент шаҳрида Zeekr 001 автомобили зарядлаш пайтида ёниб кетганди. Kun.uz суд ҳужжатлари асосида воқеа тафсилотларини ўрганди.
Воқеа хронологияси
Иш ФИБ Яккасарой туман судида кўриб чиқилиб, 2026 йил 8 майда ҳал қилув қарори эълон қилинган. Қарорга кўра, 10 апрел куни тунда Ҳотамбек Мирзаев ўзига тегишли Zeekr 001 автомобилини қувватлаш учун “Халқлар дўстлиги” санъат саройи ёнидаги автотураргоҳда жойлашган Tok Bor брендига тегишли станцияга келган. Соат 1:46 да зарядлаш учун старт тугмаси босилган. Бу пайтда электромобилнинг қуввати 7 фоиз бўлган. Мирзаев машинасини қолдириб, уйига кетган.
Соат 3:51 да станция электромобилга қувват беришни тўхтатган ва сессия якунланган. Ўша пайтда машинадан тутун чиқиши ёки носозлик аломатлари кузатилмаган. Орадан 3 соатга яқин вақт ўтгач, соат 7:30 лар атрофида электромобилнинг олд қисмидан тутун чиқиши кузатилган ҳамда машина ёна бошлаган. Бахтсиз ҳодисани кўрган атрофдаги одамлар ФВБга хабар берган.
Бу кейснинг муҳим жиҳатларидан бири – машинани таъмирлаш билан боғлиқ. 2025 йил 25 январ куни Zeekr’нинг эгаси машинани “E-GO MOTORS” МЧЖга тегишли автосервисга олиб борган. Бунга машинанинг қуввати 50 фоиздан пасайганда бирданига 0 фоизга тушиб кетаётгани сабаб бўлган.
Экспертиза хулосаси
Суд ҳужжатида келтирилишича, ёнғин сабабини аниқлаш учун бир неча бор текширув ва экспертизалар ўтказилган. Дастлабки текширувларда ёнғин электромобилнинг литий-ион аккумулятор батареясида юзага келган “иссиқлик тезланиши” оқибатида содир бўлгани қайд этилган.
Кейинчалик суд ноаниқликларни тўлиқ бартараф этиш ва умумий хулосага келиш учун якуний экспертиза тайинланган. Бунда мутахассислар қуйидаги хулосага келган: “Транспорт воситасида содир бўлган ёнғинга автомобилни ишлаб чиқарган корхонанинг алоқаси бўлмаган. Ёнғин аккумулятор батареясида таъмирлашдан кейин ячейкаларнинг ички қаршилик ва сиғим бўйича номутаносиблиги сақланиб қолгани сабабли юзага келган қизиш ҳамда ички қисқа туташув натижасида ривожланган термик тарқалиш жараёни оқибатида келиб чиққан”.
Содда қилиб айтганда, батарея ичидаги ячейкалар бир маромда ишламаган. Оқибатда унинг айрим қисмлари ҳаддан ташқари қизиб, ички қисқа туташув юз берган ва батарея ичкаридан ёна бошлаган.
