Ўзбекистонда стратегик аҳамиятга эга корхоналарни хусусийлаштиришда давлатнинг вақтинчалик махсус иштирок этиш ҳуқуқини сақлаб қолиш амалиёти жорий этилади.
Бундан мақсад – миллий хавфсизлик, ижтимоий барқарорлик ва аҳоли манфаатларини ҳимоя қилиш, дейилади хусусийлаштириш жараёнларини жадаллаштириш бўйича 28 август куни имзоланган президент фармонида.
Фармонга кўра, давлатнинг вақтинчалик махсус иштирок этиш ҳуқуқи халқаро тажрибадан келиб чиқиб, йирик ва стратегик корхонани хусусийлаштиришда қўлланади ва президентнинг махсус қарори билан жорий этилади.
Ушбу ҳуқуқ хусусийлаштиришдан олдин оммавий ошкор қилинади.
Эслатиб ўтамиз, Ўзбекистонда давлатнинг хусусийлаштирилган акциядорлик жамиятлари фаолиятида иштирок этиш бўйича “олтин акция” ҳуқуқи 2022 йилда бекор қилинган эди. Бу механизм орқали давлат хусусийлаштирилган корхоналарнинг кузатув кенгашларига ўз вакилини киритиши ва шу орқали алоҳида қарорларга вето қўйиши мумкин эди.
- 28 августдаги фармон билан, Давлат активларини хусусийлаштириш ва хусусийлаштириш жараёнларини мувофиқлаштириш бўйича давлат комиссияси фаолияти тугатилмоқда. Комиссия ваколатлари Давлат активларини бошқариш агентлигига ўтказилади.
