АҚШ президенти Доналд Трамп агар ноябр ойида бўлиб ўтадиган оралиқ сайловларда республикачилар Вакиллар палатаси ва Сенат устидан назоратни сақлаб қоладиган бўлса, АҚШнинг ҳар бир вояга етган фуқаросига 5 минг доллардан тўлашга ваъда берди.

«Агар республикачилар Вакиллар палатаси ва АҚШ Сенатини сақлаб қолса, бизнинг ақл бовар қилмайдиган иқтисодий муваффақиятимиз туфайли... мен Америка Қўшма Штатларининг ҳар бир вояга етган фуқаросига 5 минг доллар миқдорида дивиденд тўлайман», – деган президент Республикачилар партиясининг Техас штати Даллас шаҳрида ўтган қурултойида.

У буни «муваффақиятли компанияларнинг инвесторларга дивиденд тўлаши»га ўхшатган.

«Ягона чеклов шундаки, дивидендлар АҚШда сарфланиши керак. Биз пулларни Канадага бориб сарфлашингизни хоҳламаймиз. Биз сизнинг Хитойга, Германияга боришингизни истамаймиз... Сиз пулларни АҚШда сарфлашингиз керак», – дея қўшимча қилди Трамп.

Қайд этиш керакки, бу тарихда АҚШ президенти сайловчилар овозини жалб қилиш кампанияси доирасида америкаликларга бундай тўловлар ваъда қилаётган биринчи ҳолатдир.

Бундан ташқари, бу маблағларни айнан ким йўналтириши, Америка ҳукумати уларнинг қандай сарфланишини қай тарзда назорат қилиши ва умуман, бундай тўловлар қанчалик қонуний экани ҳам номаълумлигича қолмоқда.

Трамп кўпинча митинглар пайтида эътиборни жалб қилиш учун жуда ғайриоддий ғояларни илгари суриши маълум.

2025 йилда АҚШнинг балоғатга етган аҳолиси сони 267 млн киши атрофида бўлган. Бу шуни англатадики, уларнинг барчасига «Трампнинг 5 минг долларлик дивидендлари»ни тўлаш учун жами 1,34 трлн доллар керак бўлади (лекин Америка аҳолисининг барчаси ҳам Америка фуқаролари эмас).

Ҳозирда Демократик партия аксар сўровларда етакчилик қилмоқда ва Вакиллар палатаси ва ҳатто Сенатни назорат қилиш учун яхши имкониятга эга.

Трамп АҚШ тарихида президент партияси оралиқ сайловларда мағлуб бўлиши кўп учраганини эслаган. «Биз буни ўзгартиришимиз керак», – деган у ва америкаликларни «бюллетенда Трамп исми кўрсатилгандек» овоз беришга чақирган.

Техасдаги чиқиши чоғида Трамп ноябр ойида Республикачилар партияси мағлубиятга учраши – америкаликлар «чегараларни йўқотиши, солиқлар камайишидан маҳрум бўлиши ва хавфсизлигини бой бериши»ни англатишини айтган. «Сизни яна икки йил аввалгидек даҳшатли дўзах кутади», – дея қўшимча қилади АҚШ президенти. У АҚШ «бутун дунё учун масхара бўлгани», аммо ҳозир ҳеч ким унинг устидан кулмаётганини таъкидлаган.