Ҳужжатга кўра, профилактик эмлаш Бош давлат санитария врачининг қарори асосида жорий этилади.
Профилактик эмлашни жорий этишга юқумли касалликнинг ҳудудда аниқланиши, касалликнинг кенг тарқалиши ёки айрим гуруҳларга юқиши асос бўлади.
Эмлаш биринчи навбатда касалликни юқтириш ёки бошқаларга юқтириш хавфи юқори бўлган шахслар, касаллик ўчоғида бемор билан мулоқотда бўлганлар ҳамда эпидемиологик кўрсатма бўйича эмланиши лозим бўлган шахслардан бошланади.
Профилактик эмлаш давлат рўйхатидан ўтказилган ва тиббиётда қўлланилишига рухсат этилган вакцина билан амалга оширилади.
Профилактик эмлашда шахс тиббий кўрикдан ўтказилиб, вакцинага сезувчанлик, илгариги оғир аллергик реакция ва бошқа қарши кўрсатмалар мавжудлиги аниқланади.
Шахсга вакцина ва унинг эҳтимолий таъсири, эмлашдан кейинги кузатув ҳамда эмлашни рад этишнинг ҳуқуқий оқибатлари ҳақида маълумот берилади.
Профилактик эмланган ҳар бир шахс тўғрисидаги маълумотлар эмлаш ўтказилган заҳоти Ягона тиббиёт ахборот тизимига киритилади.
Профилактик эмланган шахс дастлабки 30 дақиқа тиббиёт ходими, кейинги 3 кун давомида эса шифокор ва патронаж ҳамшира кузатувида бўлади.
