Американинг CNN, MS NOW ва Politico оммавий ахборот воситалари Вашингтон округ судига АҚШ президенти Доналд Трамп ҳамда унинг маъмуриятининг бир қатор юқори лавозимли вакилларига қарши қўшма даъво киритди.
Бунга ушбу таҳририятлар журналистларининг Оқ уйга кириш ҳуқуқидан маҳрум этилиши сабаб бўлди.
ОАВнинг қўшма баёнотида даъводан кўзланган мақсад АҚШ Конституциясига киритилган ва сўз ҳамда матбуот эркинлигини кафолатлайдиган Биринчи тузатишни ҳимоя қилиш экани айтилди.
Нашрларга кўра, ҳукумат оммавий ахборот воситалари нимани ёритиши ёки эълон қилиши юзасидан қарор қабул қилмаслиги керак.
Улар Оқ уй ўз фаолиятининг ёритилишидан норози бўлгани учун журналистик аккредитацияларни олдиндан огоҳлантирмасдан бекор қилганини билдирди. Даъвогарлар бу қарор судда баҳслашилмаса, матбуот эркинлиги ва жамоатчиликнинг ҳукумат таъсиридан холи ахборот олиш ҳуқуқига таҳдид туғдиришини таъкидлади.
21 сентябр куни нашрлар Вашингтондаги федерал судьядан журналистларнинг Оқ уйга киришига қўйилган тақиқни зудлик билан бекор қилиш ва уларнинг аккредитацияларини тиклашни сўради.
CNN, MS NOW ва Politico мухбирлари 19 сентябр куни Оқ уйга киришга уринган, бироқ АҚШ Махфий хизмати ходимлари уларни бинога қўймаган ва рухсатномаларини олиб қўйган.
Даъвогарларнинг таъкидлашича, бу чора Доналд Трампнинг кўрсатмаси билан журналистларни аввалги танқидий материаллари учун жазолаш ва келгусида маъмурият ҳақида юмшоқроқ ёзишга мажбурлаш мақсадида кўрилган.
Бундан бир кун аввал Трамп CNN, MS NOW ва Politico унинг фаолиятини «адолатсиз» ёритаётганини айтиб, уларни Оқ уйга кириш ҳуқуқидан маҳрум қилиш кераклигини билдирган эди.
Трамп Truth Social ижтимоий тармоғида даъвога муносабат билдириб, Оқ уй эркин матбуотга эмас, «сохта хабарлар»га қарши курашаётганини айтди. У мазкур ОАВни миллий хавфсизликка таҳдид деб баҳолади.
Нашрлар манфаатини ҳимоя қилаётган адвокат Теодор Бутроус журналистларнинг Оқ уйга киришини тақиқлаш президент фаолияти ҳақида холис ва фактларга асосланган ахборот олиш ҳуқуқига эга Америка жамоатчилигига зарар етказишини билдирди.
21 сентябр куни Оқ уй телевизион пули консорциуми раиси вазифасини бажарувчи ва Fox Newsʼнинг Вашингтон бюроси раҳбари Брайан Боутон CNNʼга пул доирасидаги вазифаларини бажаришга рухсат берилмаётгани сабабли телевизион пул Доналд Трамп иштирокидаги тадбирларни ёритишни тўхтатишини маълум қилди.
