ВГТРК мухбири Валентин Богданов Ню Йоркда бўлиб ўтаётган БМТ Бош ассамблеяси доирасида Украина президенти Володимир Зеленскийдан қачон Москвага ташриф буюриши ҳақида сўради. Кремлдагилар Россия ва Украина президентлари ўртасидаги учрашувни фақат Москвада ўтказиш мумкинлигини айтиб келишади.
Ижтимоий тармоқларда тарқалган видеога кўра, россиялик пропагандачи Зеленский кўчада бошқа журналистлар билан инглиз тилида гаплашиб кетаётганида ортдан етиб борган. Богданов унга рус тилида бир неча марта шу жумлаларни айтиб бақирган: «Владимир Александрович, Москвага қачон?»
Украина президенти аввалига унинг саволини эътиборсиз қолдирган, аммо якунда қисқача қилиб шундай деган: «Ракетада», катта эҳтимол билан, қўшимчасига сўкиниб ҳам қўйган (видеода охирги сўзни тушуниб бўлмайди).
Россия президенти матбуот котиби Дмитрий Песков брифингда Украина раҳбарининг баёнотига қуйидагича изоҳ берди: «Биринчидан, Зеленский Москвага келишдан бош тортмаган, ҳар ҳолда бундай сўзни эшитмадим. У ҳозир Ню Йоркда БМТ Бош ассамблеяси доирасида кўплаб баёнотлар бермоқда. Ўт очишни тўхтатиш масаласига келсак, яна бир бор такрорлаймиз – биз вазиятни тинч йўл билан ҳал қилиш жараёни учун очиқмиз, аммо вақтинчалик сулҳга эмас, айнан тинчликка интилиш керак деб ҳисоблаймиз. Бизнинг бу позициямизда ҳеч қандай ўзгариш йўқ».
