25 сентябр куни Пенсия таъминоти тизимини такомиллаштириш бўйича таклиф этилаётган ислоҳотларга бағишланган матбуот анжумани бўлиб ўтди. Унда Иқтисодиёт ва молия вазирлиги ҳамда Бюджетдан ташқари пенсия жамғармаси мутасаддилари иштирок этди.
Тадбирда Kun.uz мухбири пенсия ислоҳоти бўйича жамоатчилик муҳокамасининг қисқа муддатга белгиланганига, лойиҳа юзасидан билдирилаётган қарши фикрлар ҳамда пенсияни ҳисоблашда иш ҳақининг 20 йиллик даврини инобатга олиш таклифига оид саволлар берди.
Лойиҳа нега камида 15 кун муҳокамада бўлади?
Пенсия ислоҳоти лойиҳаси 15 сентябр куни жамоатчилик муҳокамасига жойлаштирилган. Муҳокама 30 сентябрда якунланиши белгиланган.
Савол-жавоб давомида лойиҳанинг жамоатчилик муҳокамасида нега айнан 15 кун туриши, пенсия тизимидаги ўзгаришлар миллионлаб фуқароларнинг манфаатларига дахлдор экани сабабли муҳокама муддатини узайтириш мумкин ёки мумкин эмаслиги сўралди.
Бюджетдан ташқари пенсия жамғармасининг Норматив базани такомиллаштириш бўлими бошлиғи Нозимжон Жўраевнинг айтишича, қонунчилик лойиҳаларни жамоатчилик муҳокамасида камида 15 кун сақлашни белгилайди. Шу билан бирга, лойиҳа 15 кундан кўпроқ вақт муҳокамада туришига ҳам чеклов йўқ.
“Ўзбекистон Республикасининг норматив-ҳуқуқий ҳужжатлар тўғрисидаги қонунига асосан, лойиҳа жамоатчилик муҳокамасида камида 15 кун туриши белгиланган. Шунинг учун ҳозир 15 кун туради, деб айтиляпти. Лекин бу лойиҳа 15 кундан ортиқ вақт ҳам туриши мумкин. Фикр-мулоҳазаларни кўпроқ жамлаш мақсадида муҳокама муддатини узайтириш мумкин, бунга чеклов йўқ. Биз ҳозир қонунчиликда белгиланган энг қисқа муддатни назарда тутяпмиз”, — деди Нозимжон Жўраев.
Қарши фикрлар ҳам лойиҳа тақдирига таъсир қилиши мумкин
Жамоатчилик муҳокамаси давомида лойиҳа юзасидан 1700 дан ортиқ фикр билдирилгани, уларнинг салмоқли қисми пенсия ёшини оширишга қарши эканига эътибор қаратилди.
Мутасаддидан фуқароларнинг, хусусан, пенсия ёшини оширмаслик бўйича билдираётган таклифлари якуний ҳужжатда инобатга олинадими, деб сўралди.
